Su Comuni de Crabas at publicau s’Avisu chi disciplinat is critèrius e is maneras po cuncedi is bonus spesa in s’àmbitu de is mesuras de apretu de solidariedadi alimentari. S’avisu est po totu is tzitadinus de Crabas chi, po nexi de s’apretu epidemiològicu de su virus COVID- 19 chi est tirendi a longu, tenint pagu resursas po sustentai su nùcleu familliari insoru.
Is esercìtzius cummerciali acreditaus po acetai is bonus spesa ant a podi fruniri sceti benis alimentaris. In s’avisu pùblicu funt postus a craru a fini a fini is rechisius po intrai e is critèrius po assinnai sa mesura de agiudu.
SU COMUNI
Ponit a disponimentu una pàgina in s’arretza e un’apricatzioni po nci mandai, is tzitadinus, is dimandas e s’acreditamentu de is atividadis cummercialis e manìgiat is dimandas arricidas finas a carculai s’assinnamentu de su bonu eletrònicu po su tzitadinu, cun s’importu chi ddi ant arreconnotu.
IS TZITADINUS BENEFITZIÀRIUS
• Intregant dimanda in lìnia.
• Arriciint su bonu eletrònicu de s’importu chi ddi ant arreconnotu a manera virtuali in sa tèssera sanidària.
• Usant su tanti chi s’Enti ddis at arreconnotu in una o prus de una atividadi cummerciali acreditada finas a spaciai totu s’importu assinnau, impreendi sa tèssera sanidària, cunfirmendi sa rennèscia de s’operatzioni a sola cun una crai de intrada chi ant arriciu cun unu messàgiu telefònicu, candu su butegheri passat in scansioni sa tèssera.
DESCRITZIONI DE IS ATZIONIS TZITADINU – ESERCÌTZIU CUMMERCIALI
1. Su tzitadinu apustis de ai arriciu a SMS su nùmeru de su bonu e sa crai de intrada andat a sa butega cun Tèssera Sanidària;
2. Su butegheri cun s’aplicatzioni “Sivoucher” giai scarrigada in antis, fait s’autèntica cosa sua, passat a scansioni su còdixi a barra, càstiat s’importu abarrau, scriit s’importu de su scàrrigu e pedit a su tzitadinu de nci poni sa crai de intrada;
3. Is Atividadis Cummercialis e su Comuni podint intrai a sa setzioni de sa Rendicontatzioni po apurai s’istadu de is scàrrigus e chi ddi torrat paris cun is faturas bogadas/arricidas.
SCADÈNTZIA ACREDITAMENTU
Is dimandas, a tràgiu de autocertificatzioni, s’ant a podi intregai movendi de is 9 oras de sa dii 22.12.2020 e finas a sa ora de is 11.59 de noti de sa dii 03.01.2021. S’at a podi intregai un’istàntzia sceti a nùcleu familliari residendi.
Sa dimanda s’at a depi cumpilai in lìnia po mesu de sa prataforma “SiVoucher”.
Informus:
Su Servìtziu Informacomunidadi de s’Unioni “Costa de su Sinis Terra de is Gigantis” est a disponimentu po informus e agiudu a is nùmerus 0783-290446 – 3408628020 e me in custas seas:
· Lun. a mangianu de sa ora de is 08,00 a sa ora de mesudii - Crabas - Bia de Matteotti
· Mar. a mangianu de is 09,00 oras a is mesudii - Arriola – Pratza de Sardegna 2 (Biblioteca)
· Mar. a merii de is 3,00 a is 7,00 – Crabas - Bia de Matteotti
· Mèr. a mangianu de is 09,00 oras a is mesudii – Arriola – Pratza de Sardegna 2
· Giò. a mangianu de is 09,00 oras a is mesudii - Crabas - Bia de Matteotti
· Cen. a mangianu de is 09,00 oras a is mesudii e a merii de is 3,00 a is 7,00 -
Su Servìtziu no est abertu me in is diis 24 e 31 de su mesi de idas de su 2020.