Abertura perlongada e cuntrollus po non s'acomunai apari me in diis anca ddui andat prus genti.
Funt is arrègulas chi at decidiu su sìndigu Andrea Lutzu, s'Assessori Francesco Pinna e su dirigenti comunali Roberto Sanna po is campusantus de sa tzitadi e de is fratzionis in ocasioni de sa festa de totu is santus e de is mortus.
Movendi de martis 27 de su mesi de ladàmini finas a amrtis 3 de donniasantu totu is campusantus de sa tzitadi e de is fratzionis ant a aberri totu de sighida de is 7 de mangianu a is 6 de merii.
In lìnia cun is normas contras a sa spaniadura de su Coronavirus, po non fai ammuntonai apari totu sa genti ant dispostu a Politzia locali e a voluntàrius de sa Protetzioni Tzivili de fai is cuntrollus.
“No eus bòfiu stabiliri mesuras prus severas cunfidendi in su sensu de responsabilidadi de is tzitadinus - narant su Sìndigu Andrea Lutzu e s’Assessori Francesco Pinna chi in custas diis ant abisitau totu is campusantus de sa tzitadi e de is fratzionis po ndi apurai is cunditzionis. - Eus decidiu de cresci is oras de abertura po favoriri s'intrada perlongada in su tempus . Sa comunidadi bivit custas diis cun intensidadi e partecipatzioni manna e s'est partu giustu a agatai solutzionis po favoriri s'arrispetu de una traditzioni arraxinada in sa cuscièntzia de totus".
“Me in is campusantus, meda in tzitadi, ddui at logu mannu e credeus ca cun su sensu de responsabilidadi de totus s'at a podi onorai s'arregordu prus caru sena de s'ammuntonai apari e sena de ndi pesai cunditzionis chi favoressint sa spaniadura de su Coronavirus – aciungint su Sìndigu Lutzu e s’Assessori Pinna -. Si intregaus a is tzitadinus po chi siant coidadosus ponendi in menti a is normas de seguresa: abarrai atesu s'unu de s'àteru, bistiri sa mascarina finas in logu abertu e sanificai is manus. Funt is arrègulas chi oramai totus connoscint, ma finas sa prus defesa manna de sa pandemia. In ònnia modu, non si sciit mai, is agentis de sa Politzia locali e is voluntàrius de sa Protetzioni Tzivili, chi sèmpiri funt a fiancu nostu in custu apretu sanidàriu, ant a fai cuntrollus in totu is campusantus".