UFÌTZIU INTERVENTOS TZIVILES: FIRMADU SU PROTOCOLLU PRO ABÈRRERE SA SEA IN ARISTANIS
In antis a is rapresentantes de sa Provìntzia de Aristanis e de is Comunos de Crabas, Milis, Aristanis, Santa Justa, Tramatza, Tzeddiani e de s’Ats-ASSL de Aristanis s’est firmadu su protocollu de intesa pro abèrrere una sea, in Aristanis, de s’Ufìtziu Interventos Tziviles de sa Procura de su Tribunale pro is Minores de Casteddu, chi at a permìtere a sa Procura de si acostiare de prus a is tzitadinos, a is Servìtzios Sotziales, Sanitàrios e a is Iscolas de su territòriu de Aristanis.
S’UIC intervenet a pitzu de situatziones de disàgiu familiare chi ponent is minores a cunditziones de vida chi noghent a s’isvilupu issoro e a pitzu de situatziones de abusu e maltratamentu presuntu.
S’acòrdiu, chi at ammustradu su Procuradore de sa Repùblica de su Tribunale de is Minores, Anna Cau, in ocasione de s’assemblea de is sìndigos de su PLUS de su distretu de Aristanis, ddu ant firmadu in prus de su Procuradore etotu, su Sìndigu de su Comunu de Aristanis comente a presidente de su PLUS Aristanis, Andrea Lutzu, e s’Amministradore istraordinàriu de sa Provìntzia de Aristanis, Massimo Torrente.
At a èssere sa Provìntzia de Aristanis a assegurare sa sea pro is traballos de s’UIV, cun un’ufìtziu in sa sa sea de sa bia de Enrico Carboni, seberu funtzionale finas pro una adesione in su benidore a su protocollu de àteros PLUS de su territòriu aristanesu.
Is operadores de s’UIC de Aristanis ddoe ant a èssere in s’ufìtziu de sa bia de Mattei tres dies a sa chida in totu 15 oras.
In degheoto annos de traballu, s’Ufìtziu Interventos Tziviles de sa Procura de sa Repùblica pro is Minores de Casteddu, at ammustradu su balore suo e ca de cussu non si nde podet fàghere a mancu assegurende a su Pùblicu Ministeru, s’agiudu suo pretziosu apurende situatziones chi bolent s’interventu de su Tribunale pro is Minores. Aberende una sea aristanesa at a permìtere de afortiare s’atividade chi portat in antis su PM in matèria de tutela de deretos de su minore in unu cuntestu de s’acostiare de prus a is tzitadinos