Esercìtziu in domu de su deretu de votu de is eletoris chi ant postu a tratamentu domiciliari o in cunditzionis de carantena o isulamentu fiduciàriu po Covid-19 - Acumprimentus e tèrminis (artìculu 3 de su decretu-lei n. 103/2020).
Sceti po is consultatzionis eletoralis e referendàrias de su 2020, is eletoris chi ant postu a tratamentu domiciliari e cussus chi s'agatant in cunditzionis de carantena o de isulamentu fiduciàriu po Covid-19 podint espressai su votu in domu insoru in su comunu de residèntzia.
Po custa arraxoni, intra de su 10 e su 15 de cabudanni (est a nai intra de sa de 10 e sa de 5 diis in antis de cussa po votai) s'eletori depit fai arribai a su sìndigu de su comunu anca est iscritu me in is listas, in modu finas telemàticu chi scerat s'enti etotu, is documentus chi sighint:
a) una decraratzioni anca s'atestat sa voluntadi de s'eletori de espressai su votu in domu sua inditendi a craru s'indiritzu intreu de su domicìliu etotu;
b) unu certificau, chi lassat unu funtzionàriu mèdicu chi ddu ant incarrigau is òrganus de cumpetèntzia de s'azienda sanidària locali, in data non prima de su 6 de cabudanni (sa de 14 diis prima de sa data de sa votatzioni) chi atestat sa cunditzioni chi est in s'artìculu 3, comma 1, de su decretu-lei (tratamentu domiciliari o cunditzioni de carantena o isolamentu fiduciàriu po Covid-19).