In tzitadi movit s'arragorta de s'ollu usau de is impitus de logu de domu.
Est sa primu borta chi acontessit de candu at mòviu s'arragorta sceberada de s'àliga.
Su servìtziu nou ddu at programmau s'Assessorau a s'Ambienti de su Comuni de Aristanis e ddui traballat "Formula Ambiente", sa dita chi s'est agiudicada sa gara de apaltu de su servìtziu de igieni urbana de su Comuni de Aristanis.
S'arragorta s'at a fai passendi de domu in domu, una borta a su mesi.
“In custa parti initziali, s'ollu usau s'at a assoddiri impari a sa primu arragorta de su mesi de s'ùmidu - ponit a craru s'Assessori a s'Ambienti Gianfranco Licheri -. Sa dita s'at a incurai de spaniai a totu is impitus su calendàriu aposta".
Su servìtziu movit luegus. In gennàrgiu, s'arragorta s'at a fai sa dii 12 me in is zonas 4, 5 e 6. Su 15 de gennàrgiu po is zonas 1,2 e 3.
Po intrai a su servìtziu tocat a annotai in antis s'arretiru a su Nùmeru Birdi 800 632 270, s'ollu tocat de ddu poni in sa pròpia botìllia anca fiat prima s'ollu nou o in ònnia modu in unu stèrgiu de plàstica.
“Est unu servìtziu chi su Comuni nci tenit meda - sighit a nai Assessori Licheri -. Sa dita apaltadora si est assuntada de ddu fai candu at fatu s'oferta tècnica e seus prontus a movi. Seus chistonendi de una tèssera in prus chi s'at a permiti de fai mellus s'arragorta sceberada, arregordendi ca is aristanesus funt bastanti virtuosus ismartendi s'àliga, ma ca teneus su doveri, de su 2021, de abarrai firmus in una percentuali de àliga sceberada asuba de s'80%".
Est unu beni su de poni a craru ca de is domus s'at a pinnicai ollu vegetali e non cussu de natura industriali. S'ollu vegetali est po su prus su de fritura.
Est fatori incuinadori meda de s'ambienti, candu si nci ghetat in terra o me in cundotas. S'abruxadura sua non controllada fait sustàntzias tòssigas, chi a sa fini si respirant. Difatis, su cuntatu cun s'àcua, candu si nci ghetat me in is scàrrigus de domu sena nisciunu tipu de coladura, ingendrat s'ammancu de ossìgenu po flora e fàuna.
Est duncas de apretu movi un'arragorta aposta po s'ollu usau, puntendi de ddu arrecuberai cun s'arregorta sceberada. Sa dita "Formula Ambiente" arregordat ca su ismartimentu fait a ddu fai finas me in is ecotzentus chi si trantzint de unu logu a s'àteru, me in is diis e oràrius stabilius o me in s'ecotzentru postu in sa zona industriali de Aristanis.