Finas sa Provìntzia de Aristanis arrefudat s'ipòtesi chi at afateriau sa Sogin e chi ant aprovau is Ministrus de su Svilupu Econòmicu e de s'Ambienti, chi scerat 14 logus in Sardigna anca iat a fai a ndi pesai su Depòsitu natzionali de scòrias e arrefudus radioativus.
“Sa Provìtzia de Aristanis si ponit cun fortza in sa parti de is Comunus de s'aristanesu tocaus e scerau inderetura comenti a logus anca iat a fai a ndi pesai depòsitus de scòrias radioativas" - est firma sa positzioni de s'Amministradori Straordinàriu de s'Enti, Màssimo Torrente, prontu a atacai un'atzioni istitutzionali aunida chi impari a totu is fortzas polìticas e sotzialis de su territòriu arrefudat, sena de nci pensai meda, ònnia ipòtesi de stocàgiu de is scòrias in s'aristanesu, e prus a mannu, in s'ìsula" .
“Su benidori de sa Sardigna est acapiau a is produtzionis agrìculas e a is allevamentus de calidadi chi no andant de acòrdiu cun unu depòsitu de scòrias nucrearis in un'ìsula a vocatzioni turìstica acapiada a sa natura incontaminada. Sa Provìntzia, e de seguru totu is istitutzionis de Sardigna, no at a fai de mancu de defensai totu custu e - arregordat Torrente - sa Sardigna at giai nau ca NO, sena duda peruna, a s'energia nucreari e a su depòsitu de scòrias cun su referendum populari de su 2011" .