Su comunu de Aristanis at postu 4 domus de s'àcua chi abarrant in funtzioni po asumancu 13 oras a sa dì de is 6 de mangianu a is 11 de merì, fina in is diis de festa.
S'àcua fait a dda pagai cun una scheda o craixedda prepagada, furnida de su cuntzessionàriu ma finas cun dinai in muneda e paperi.
S'àcua costat 5 centèsimus a su lìturu si si pagat in dinai, e 4 centèsimuss si si pagat cun sa scheda.
Is ischedas s'ant a giai a indonu a is famìllias abisongiosas e s'ant a podi arretirai finas a 700 lìturus de àcua.
Sa cooperativa chi si òcupat de su servìtziu, versat a su comunu su 9% de su chi ricavat e 4000 èurus po ocupai su solu pùblicu. in prus si depit incurai de sa limpiadura de is logus inui si giait s'àcua, de is murus, de cuntrollai e arramprasai is filtrus, de sanificai is tubus, de torrai a pònniri anidridi carbònica candu ammancat e de fai is analisis de s'acua ònnia tres mesis.
Su Comunu de Aristanis imperat custu 9 % po promovi su progetu, fedendi puntus nous po distrubuiri s'àcua e aciungendi àteras craixeddas a indonu po is chi tenint abisòngiu.
Is tèsseras fait a ddas comporai in is localis de via Carlo Meloni e in is domus de s'àcua etotu, in is edìculas de via Carnia, via Repubblica, via Carbonia e via Adua in Silì, ònnia domu de s'àcua podit furniri finas a 1.500 lìturus de àcua a sa dì, agiudendi a arrisparmiai finas a 1000 butìllias de plàstica a sa dì, 365 milli a s'annu e 14 milli e 600 chilus de arrefudus de plàstica a s'annu.