ÀREAS PIP. Crabas bincit su bandu regionali e s’agiùdicat unu millioni de èurus.
S'Assessorau de s'Indùstria at assinnau a su Comuni de Crabas unu finantziamentu de unu millioni de èurus po afortiai s'àrea comunali PIP, gràtzias a ai pigau parti a su Bandu regionali in favori de is entis localis po ndi pesai Pranus de insediamentu Produtivus.
Est sa prus cifra manna de totu is biddas de sa Provìntzia chi ant pigau parti a su Bandu.
“Inghitzat cun novas bellas s'annu nou po s'Amministratzioni comunali, po Crabas e prus de totu po is artesanus de s'àrea PIP - at decrarau su Sìndigu Andrea Abis -. Est un'arresurtau chi si prenit de galla, casi ca dimostrat ca su progetu intregau ddu ant crètiu balenti e minescidori de unu finatziamentu aici mannu".
Su bandu de sa RAS po fai interventus po poni in seguresa, po fai mellus s'eficèntzia energètica e tecnològica de is infrastruturas ddu iant publicau in su mesi de maju de su 2020. Cun delìbera de su 6 de austu de su 2020 sa Giunta, a ghia de su Sìndigu Abis, iat stabiliu de ddui pigai parti intreghendi unu progetu de 1 millioni e 200 milla èurus comenti a coofinantziamentu comunali. In su mesi de trèulas sa Giunta iat deliberau su pranu de interventus chi abisòngiant po torrai a modulai in mellus totu s'àrea PIP crabarissa, in zona Is Cortillaris.
“Boleus sfrutai a su mellus custa cifra de importu meda chi s'ant postu a disponimentu - at postu a craru su primu tzitadinu -. Su nostu est unu progetu chi ponit in contu interventus de manutentzioni e po poni in seguresa bias e marciapeis, cun s'ammodernamentu de s'illuminatzioni pùblica a sa tecnologia "led". Eus a teni modu de ndi pesai àterus servìtzius e infrastruturas de interessu comunali".
“S'est postu in contu finas de installai s'arretza po sa fibra, po assegurai sa lìnia "internet" lestra in totu su logu, e s'impiantu fotovoltàicu po produxi energia - at aciuntu s'Assessori a s'Urbanìstica Enrico Giordano -. S'ant a torrai a donai balori a is àreas birdis, cun sa novidadi de ndi pesai ortus urbanus, de modu chi simpris tzitadinus ant a podi traballai terrixeddas e at a permiti una socializatzioni de s'àrea. Custu bolit nai ca nci at a ai un'impiantu de arragorta de àcua smartida a servìtziu de is ortus urbanus".
Su progetu ponit in contu finas sa nàscida de un'àrea frunida po fai "fitness", ufìtzius nous, archìvius e un'àrea po bendi.