Su vìdeu nou informativu de su progetu "Diabete e Sport 3.0”, a disponimentu in s'arretza, est dedicau a Manuela Musu.
Manuela Musu, classi 1980 cun diabeti de tipu1, est amantiosa de sa currera e de is sfidas sportivas de livellu artu. Una picioca simpri cun unu coràgiu e fortza manna.
Est stètia protagonista me in is 100 km de su "passadori", unu tretu chi movit de Firenze e arribat a sa tzitadina de Faenza. Apustis 12 oras e 29 minutus at tocau s'arribu.
“Diabete e Sport 3.0” est su progetu chi est incurendi s'Aniad Sardigna (Assòtziu Natzionali Italiana Atletas Diabèticus) e su Servìtziu de Diabetologia e maladias metabòlicas de sa Assl de Aristanis, cun su patrocìniu de sa Regioni Autònoma de Sardigna, de s'Assòtziu Mèigus Diabetòlogus Sardigna (AMD Sardigna) e de sa Sotziedadi Italiana de Diabetologia (SID) e Diabeti Itàlia.
S'Assessora a su sport de su Comuni de Aristanis Maria Bonaria Zedda, arreconnoscendi s'importu sotziali de s'initziativa, ddu at cumpartziu e ddu favoressit ospitendi e veiculendi cun su situ istitutzionali is 16 vìdeus informativus asuba de su tema de su sport comenti a aina de preventzioni e de gestioni de su diabeti, po totu sa genti, e in mesu a totu po is chi funt fertus de maladia, chi disìgiant de s'acostai a sa pràtica de s'atividadi motòria.