In Sardìnnia su fueddu de prus importu in is festas de Paschixedda est " pasca".
E si Paschixedda in campidanesu, e Pasca de Nadale in logudoresu, funt is duus fueddus prus
imperaus po inditai sa festa de sa nàscida de Gesus e sa peràula de importu est duncas
“pasca” chi in sardu bolit nai “festa”, su fueddu "pasca" dd'agataus finas po inditai sa chi in italianu naraus "epifania", est a nai "sa Pasca de is tres reis”; custu est su nòmini sintzillu de s’epifania in Sardìnnia (chi lompit su 6 de gennàrgiu), ca sa Befana est arribada de pagu tempus innoi, sendi una festa italiana.
In is tempus antigus fiant is tres reis a bitiri is istrennas e is durcis a is pipius. Ma est beru
puru chi calincuna bidda e tzitadi de s’ìsula giai nci fiat su Ninnu o Ninnicheddu (ainnantis de
Santa Claus) ca portàt is donus a is pipieddus.
Po sa pasca de is tres reis in Sardìnnia acostumant a fai durcis e mandiaris caraterìsticus:
- arremonaus unu impastu durci cun aintru una fa, unu cìxiri e unu fasolu. S'impastu, una borta cotu si cumbidat e chini agatat su legùmini aintru, at a tènniri bona sorti po totu s'annu.
- una àtera usàntzia chi agataus, po ndi nai una in Benetutti, est su de fai “su càpidu de s'annu" unu pani biancu chi si fait in sa noti de annu nou e chi apustis si arrogat in conca de su prus piticheddu de sa domu su 6 de gennarxu po portai bona sorti.
Cun su matessi sentidu in Nule si fadiat “sa pertusìta”.