Cun sa poesia cun su tìtulu “Sono ancora lì” Giuseppina Sanna de Terraba at bintu su cuncursu " Emozioni di Sartiglia".
Is nòminis de is bincidoris de su cuncursu ddus at scoviaus sa giuria in su canali "YouTube Sartiglia Magazine".
S’òpera de Giuseppina Sanna dda ant giudicada sa mellus in mesu a 42 chi ant pigau parti a su cuncursu chi at bandiu sa Fundatzioni Aristanis in ocasioni de sa Sartiglia 2020 , su cuncursu chi in passau fiat feti po àteras formas de espressioni artìstica, ocannu ddu ant dedicau a sa poesia e ndi ant pigau parti in medas finas de continenti.
A su cuncursu ant pigau parti 42 cumponimentus chi ndi arribant de totu Itàlia: non sceti de sa Sardigna ma finas de sa Lombardia, Vènetu, Campània, Emilia Romagna, Làtziu a cunfirma de su sucessu mannu chi at tentu foras de s'ìsula.
Sa giuria, chi fiant Maria Grazia Atzeni, Santina Raschiotti e Maurizio Casu, apustis de ai spriculau a fini a fini is poesias arribadas, at assinnau is primus tres prèmius a is poesias de impatu emotivu forti, chi torrant paris a is cànonis chi at postu in contu sa cummissioni. In prus de su primu, segundu e su de tres classificaus, ant assinnau cuatru arremonis de onori ai is cumponimentus chi ddu miscesciant segundu a is rechisius de su regulamentu de su cuncursu.
Is cumponimentus chi ant bintu e totu is àterus puru ddus ant postus in una publicatzioni chi at bòfiu sa Fundatzioni Aristanis, chi ocannu chi benit s'at a mandai a totu cussus chi ant pigau parti a su cuncursu.
Su segundu prèmiu est andau a Simone Musu cun sa poesia “Tam Taradam” e su de tres a Martina Serra con “La Sartiglia è sinestesia”. Is poesias chi ant tentu arremoni funt cussas de Pierpaolo Sanna (Aristanis) “Le Amazzoni”, de Carlo Piu (Limbiate - MB) “All’ombra della Madonnina”, de Palmiro Pilloni (Gonnacodina) “Sartiglia” e de Sebastiano Cau (connotu Eliano) de Sòrgono “Fiore di Oristano”. A su primu crassificau ant donau unu prèmiu a dinai de 500 èurus, a su segundu 300 èurus a su de tres 200 èurus