Publicau s’Avisu po assinnai “bonus spesa” po comporai mandiari e benis de primu necessidadi
S’Assessorau a is Polìticas Sotzialis fait sciri ca ant publicau s’Avisu pùblicu po assinnai is Bonus Spesa po comporai mandiari e benis de primu necessidadi.
Podint intregai dimanda po intrai a is Bonus Spesa po comporai mandiari e benis de primu necessidadi totu is tzitadinus chi s’agatant in dificultadi econòmica mala meda po ai pèrdiu o po s’essi amenguada sa capassidadi de rèditu insoru po nexi de s’apretu sanidàriu de Covid-19 o ammostant de non teni dinai lìcuidu chi no acuntentat is abisòngius de primori de su nùcleu familliari insoru e chi rispetant impari custus rechisius:
a) de teni sa residèntzia in su Comuni de Aristanis o de teni tìtulu idòneu de sogiornu bàlidu.
b) de teni nùcleu familliari cun unu rèditu e/o intradas netas in totu pigadas in su mesi de onniasantu de su 2020:
non prus artu de € 1.200,00 a nùcleus finas a 3 cumponentis;
non prus artu de € 1.500,00 a nùcleus de 4 o prus cumponentis.
c) su nùcleu familliari non depit teni in banca/posta, cartas prepagadas o àteras formas de stràviu chi sartant is € 3.000,00 a sa data de intregu de s’istàntzia.
Is dimandas s’ant a depi intregai movendi de sa dii 07/01/2021 finas a su 22/01/2021 intreghendi istàntzia sceti cun sa prataforma in lìnia “SiVoucher”, chi at a essi a disponimentu movendi de su 7 de gennàrgiu.
Po assistèntzia in sa cumpilatzioni de sa dimanda fait a castiai su vìdeu cursu “SiVoucher” – chi ammostat totu sa carrera po scriri sa dimanda de is bonus spesa apretu COVID-19 - a custu indiritzu: https://youtu.be/ttyGGyOugRk
Is tzitadinus, in prus, ant a podi arriciri is informus e s’agiudu chi serbit po cumpilai s’istàntzia in:
su Servìtziu Informacitadi (apustis de s’essi annotaus in antis)
- su lunis, mèrcuris e cenàbura, oràriu 9:00 – 1:00 de meigama
- su martis e sa giòbia finas a su merii, oràriu 4:00 -7:00
- tel. 0783/791628 e tel. 0783/791629, posta eletrònica: informacitta@comune.oristano.it
- cuntatu “WhatsApp” 3402569808 (sena de telefonai).
S’assinnamentu de is Bonus Spesa, finas a spaciai is resursas chi at assinnau su Ministeru, s’at a fai sighendi is prioridadis chi narat s’avisu pùblicu e sa cumpositzioni de su nùcleu familliari anagràficu. Is Bonus Spesa s’ant a donai a tràgiu de bonu eletrònicu.