S’Amministratzioni Comunali at bandiu una manifestatzioni de interessu po sa cuncessioni in usu de su Teatru “A.Garau”. Su cuncessionàriu at a depi, cun initziativas chi ddu apoderint biu e chi faint aproliai genti, favoressi su traballu a manu de pari cun assòtzius, grupus de cumpangias e operadoris culturalis.
“Boleus torrai su Teatru a sa tzitadi e a ddi donai importu cun programmatzionis artìsticas e culturalis, de calidadi, de importu regionali, natzionali e internatzionali, narat su Sìndigu Andrea Lutzu – cun sa punna crara de fai su Teatru unu logu de eventus, spetàculus e fainas culturalis de sa tzitadi”.
“Su cuncessionàriu ideali – aciungit s’assessori a sa Cultura Massimiliano Sanna - at a depi favoressi una programmatzioni chi totus ndi podint gosai, impunnada a favoressi sa crèscida culturali de sa tzitadinàntzia puntendi asuba de is formas de spetàculu de su connotu ma finas a initziativas de sa traditzioni locali e dialetalis, e a fai acostai is generatzionis noas tantu a is formas de spetàculu usualis, cantu a is linguàgius nous e a is prus sperimentatzionis originalis contemporàneas”.
S’assinnamentu s’at a donai una borta chi ant intregau progetu is sugetus interessaus chi ammostant de teni is arrechisius po ndi poni in pràtica su programma propostu, arrispetendi is punnas de s’Amministratzioni, chi si ponit comenti a bidea de torrai su Teatru a sa tzitadi e a ddu torrai a portai in artu cun programmatzionis artìsticas de calidadi, de importu regionali, natzionali e internatzionali.
Immui in su teatru nci at 278 postus in pràtea abetendi de acabbai is traballus giai postus in contu e aprovaus cun delìbera de su mesi de onniasantu de su 2018.
Is traballus po ddu acabbai pertocant sa parti de su pàtiu/intrada chi ant a portai a fai capi in totu 398 postus cun sa possibilidadi de assinnai logu in prus a su cuncessionàriu.
S’ammitint a sa procedura de manifestatzioni de interessu totu is sugetus chi tenint is arrechisius chi serbint postus a craru in su bandu chi si podit scarrigai de su situ ufitziali de su Comunu (https://www.comune.oristano.it/it/servizi/atti-e-documenti/bandi-e-avvisi/index.html).
Sa cuncessione at a durai 3 annus e est facultadi de s’amnministratzioni, candu in su tempus de cuncessioni non funt acabbaus is traballus, apustis ai valutau is atividadis culturalis fatas, sa gestioni fata beni de s’immòbili, de prorogai su cuntratu de àterus tres annus, a cunditzioni de torrai a negoziai movendi de is arresurtaus econòmicus tentus me in is primus tres annus.
Informus in prus de caràteri tècnicu-procedurali, organitzativu, de argumentu chi pertocant su bandu e totu is documentus, depint arribai sceti a posta eletrònica certificada a: istituzionale@pec.comune.oristano.it.
Po intregai is propostas nci at tempus finas su 1 de martzu de su 2021.