Su trigu cotu in Sardigna est in su connotu su pratu de sa dii de Annu nou comenti a aùguriu bellu po s'annu intrau, po non fai buscai a is pipius maladias a buca e po augurai a totus cosa de papai meda.
De su restu su trigu etotu est de sèmpiri sìmbulu de saludi e prosperidadi.
Abarrat durci casi ca s'aprontat cun saba.
Una borta chi si scedatzat su prus trigu bellu, tocat de ddu sciacuai beni e a ddu poni a amoddiai in s'àcua in unu stèrgiu ammantau, una dii e una noti, arregordendi-sì de ddi cambiai s'àcua unus cantu bortas.
Acoa si ponit àcua a buddiri in una pingiada e candu est crocoliendi tocat a nci ghetai su trigu.
Nci bolit assumancu unu cuartu de ora po ddu coi, ma est mellus a ddu tastai!
Una borta studau su forreddu, sa pingiada tocat de dda poni a assentai ammantendi-dda a palla (aici acostumànt a fai), o a manta. Aici comenti est, abarrat assumancu una noti.
Su mangianu infatu si scolat su trigu e si cundit cun saba. Abarrat prus saboriu chi est assentau una scutixedda.
Saludi e trigu a totus!