Sa bidda de Mòguru est nodida non feti po s'arti de su tessìngiu ma finas po unus cantu produtus de su setori agrualimentari chi de sèmpiri at tentu grandu importàntzia.
Su mulinu, su caseifìciu e su pastifìciu nasciant in Mòguru giai a s'inghitzu de su '900
gràtzias a s'abilesa de sa famìllia Marchinu e finas a dì de oi ddui est in sa bidda unu mulinu de sa famìllia Maccioni chi traballat su trigu de su sartu de sa Marmidda.
Is panifìcius de sa bidda produsint pani traditzionali comenti a
su civraxu, su cocoi e sa lada e is durcis tìpicus de sa Sardìnnia comenti a su pani saba, is pabassinus, is galletinas, is biancheddus, is pàrdulas de casu e arrescotu, seadas,
“gattou” e àterus durcis de mèndula.
Non ammancant is casus de craba e àterus produtus de òrigini biològica, mentras in unu laboratòriu specializau traballant is ous de su mugheddu po ndu fai una butàriga chi si bendit in totu su mundu gràtzia a s'impreu de su cummèrtziu eletrònicu.