Sa de XIII editzionis de terras de làcanas filmfestival est acabbada in Sabarussa in su mesi de ladàmini, apustis de èssiri stètiu finas in Asuni e in Casteddu ma unus cantu materialis si podint biri ancora finas in su web. S'eventu cinematogràficu dd'at cuncordau s'assòtziu Su Disterru chi immoi presentat in lìnia unas cantu òperas de sa regista scozesa Jenny Gilbertson Brown, una de is primas a àiri fatu film documentàrius. Is òperas cun sutatìtulus in italianu sunt a incuru de una studiosa de Gilbertson, sa regista Shona Main.
Su primu lungometràgiu di Gilbertson, The Rugged Island – A Shetland Lyric, de 56 minutus est de su 1933: una còpia de giòvunus de una ìsula de is Shetland depit detzidi si sighiri a fai sa vida difìtzili de is massajus o si nci andai in in Austràlia.