Su Sìndigu de Crabas Andrea Abis at torrau a scriri a sa dirigèntzia de Postas Italianas, domandendi unu interventu apretosu chi arresolvat is abetus de is tzitadinus a foras de s'ufìtziu Postali de via Dante.
“Custu mangianu sa situatzioni est diventada grai meda, pensendi finas ca meda de is personas a foras de s'ufìtziu sunt antzianus e dèbilis – at decrarau su Sìndigu Andrea Abis -. Apu giai scritu bortas meda a Postas Italianas , s'ùrtima su 24 de onnisanti 2020 pedendi de allonghiai s'oràriu in sa fàscia de su merì.
Crabas tenint unu abisòngiu apretosu poita non fait prus a soportai totu custas oras in peis abetendi su turnu , in su frius e sena sa siguresa de posi poderai is distàntzias s'unu de is àterus.
Postas Italianas at arrespostu ca po immoi non podit ammanniai su servìtziu ma ndi tenit contu de sa rechesta.
Est dèpia intervenni finas sa politzia locali chi at proibiu sa circulatzioni de is veturas po assigurai sa distàntzia a is impitadoris presentis in sa strada.
“Non si podit andai ainantis in custa manera. In s'interis seus abetendi is gazebo chi s'amministratzioni at comporau in manera apretosa po amparai is impitadoris. Ddus eus a pònniri ainantis a s'ufìtziu postali”.