Su Cuncursu de poesia "Emozioni di Sartiglia" scòviat is bincidoris.
S'atobiada est cras, mèrcuris 30 de su mesi de idas, a is 4 de merii in su canali "YouTube Sartiglia Magazine".
Bandiu in ocasioni de sa editzioni de su 2020 de sa Sartiglia, su cuncursu chi in passau fiat feti po àteras formas de espressioni artìstica, ocannu ddu ant dedicau a sa poesia e ndi ant pigau parti in medas finas de continenti.
A su cuncursu ant pigau parti 42 cumponimentus chi ndi arribant de totu Itàlia: non sceti de sa Sardigna ma finas de sa Lombardia, Vènetu, Campània, Emilia Romagna, Làtziu a cunfirma de su sucessu mannu chi at tentu foras de s'ìsula.
Sa giuria, chi est Maria Grazia Atzeni, Santina Raschiotti e Maurizio Casu, apustis de ai spriculau a fini a fini is poesias arribadas, at assinnau is primus tres prèmius a is poesias de impatu emotivu forti, chi torrant paris a is cànonis chi at postu in contu sa cummissioni. In prus de su primu, segundu e su de tres classificaus, ant assinnau cuatru arremonis de onori ai is cumponimentus chi ddu miscesciant segundu a is rechisius de su regulamentu de su cuncursu.
Is cumponimentus chi ant bintu e totu is àterus puru ddus ant postus in una publicatzioni chi at bòfiu sa Fundatzioni Aristanis, chi ocannu chi benit s'at a mandai a totu cussus chi ant pigau parti a su cuncursu, non ddui ant a essi is poesias (5) chi non si podiant giudicai po mori ca fiant foras de is critèrius de partecipatzioni inditaus in su regulamentu de su cuncursu.
Su procramu de is bincidoris s'at a fai in lìnia in s'arretza su 30 de su mesi de idas a is 4 de merii a s'indiritzu https://youtu.be/I6tM8ZjYYxY