S’Assessorau a sa Cultura de su Comuni de Aristanis at prorogau finas a su 15 de gennarxu 2021 sa scadèntzia de is tèrminis po su cuncursu de ideas de su progetu “Museo a celu abertu - vista in sa tzitadi” cun piatzamentus in su cursu Umberto e via De Castro.
“A segus de is rechestas numerosas de pròroga chi sunt arribadas , eus detzìdiu de permìtiri sa prus manna partecipatzioni e duncas eus cuncordau tèrminis de iscadèntzia nous po intregai is progetus a su cuncursu de ideas po s'initziativa “Museo a celu abertu - vista in sa tzitadi - acrarat s'Assessori a sa Cultura Massimiliano Sanna -. Sa punna est cussa de amellorai sa bisura de su tzentru stòricu de Aristanis po ddu fai prus bellu e ospitali non feti po is turistas ma finas po is tzitadinus etotu, Incarrrerendi unu protzessu de avaloramentu de su cuntestu urbanu tzitadinu”.
Su cuncursu de ideas est abertu a sa partecipatzioni de totu is tzitadinus de s’Unioni Europea chi ant a dèpiri intregai propostas de positzionamentus urbanus capassus de reprodusi elementus de sa cultura, de sa stòria e de sa tradiztioni locali ma finas chi tengiant acàpius cun is temàticas de prus importu po su svilupu de sa tzitadi. Is òperas duncas ant a dèpiri rapresentai temàticas stòricas e identitàrias acapiadas, po fai unu esèmpiu a sa tzitadi giudicali, a is festa religiosas, a sa cultura e traditzioni de is Figoli, traballu de sa ceràmica e de sa terralla.
Su dinai prevididiu po fai custas òperas est 30 milli èurus.