Est in publicatzioni su bandu po agiornai s’Albu Comunali de is sugetus beneficiàrius de contributus, est a nai po iscritzioni noba e impari cuncessioni de contributus ordinàrius, po sa cuncessioni de contributus e benefìcius econòmicus a sugetus pùblicus e privaus – Setori Cultura, Turismu, Sport e Ambienti.
IMPORTU CONTRIBUTUS ORDINÀRIUS
Aprovendi su bilànciu de previsioni po s’annu 2021 ant stantziau resursas finantziàrias po € 5.000,00.
COMENTI CUMPILAI SA DIMANDA
Po sa dimanda de agiornamentu de s’Albu de is beneficiàrius, o de sa dimanda de iscritzioni, tocat a cumpilai s’allegau B e aciungendi-nci totu custus documentus:
1. còpia de s’àutu costitutivu o de su statutu registraus
2. decraratzioni cun su nùmeru de is assotziaus, su nominativu de su legali chi arrapresentat e s’elencu de is membrus de su consillu diretivu
3. relata de s’atividadi fata
4. bilànciu consuntivu chi pertocat s’annu prima o decraratzioni anca figurat de no ai fatu movimentus econòmicus
5. simmai àterus documentus.
Po sa dimanda de contributu, tocat a cumpilai s’allegau C e a ddi aciungi totu custus documentus:
1. Relata cun totu is arraxonis chi funt a fundamentu de sa rechesta e sa programmatzioni annuali 2020 chi a fini a fini ammostat is atividadis o is initziativas chi si bolint fai e sa previsioni de spesa sua, in prus de totu is àterus inditus postus in contu in custu bandu (modellu sìmbili allegau D);
2. còpia de su Bilànciu de Previsioni chi pertocat s’annu 2020
3. Rendicontu Econòmicu Finantziàriu de is gestionis chi pertocat is duus annus prima (2018 e 2019)
4. còpia de su Statutu o de s’àutu costitutivu registraus, candu non si funt giai intregaus a su Comuni
5. simmai àterus inditus postus in contu in su bandu.
TEMPUS E MANERAS DE INTREGAI
Is duas dimandas ant a depi arribai aintru de sa 1:00 de meigama de sa dii 29.01.2021, segundu a una de custas maneras:
1. a busta serrada portada inderetura a s’Ufìtziu Protocollu de su Comuni de Crabas, Pratza de Eleonora n. 1 – 09072 Crabas
2. a busta serrada po mesu de servìtzius postalis o cun corrieri.
3. Sa dimanda si podit intregai aintru de su pròpiu tèrmini finas a P.E.C., chi su titulari depit essi su Comitau e dda at a depi firmai su legali chi ddu rapresentat a firma digitali o a firma eletrònica calificada, o finas cunforma a s’art. 38, comma 3, de su D.P.R. n. 445/2000, s’at a depi mandai còpia a imàgini de su documentu de identidadi de cussu etotu.
Sa busta cun sa dimanda at a depi portai sa scrita: “Dimanda Albu e contributus ordinàrius 2020”. Chi est a PEC sa scrita si depit ponni in s’ogetu.
S’arrecàpitu de sa busta abarrat a arriscu sceti de su chi nci dda mandat, candu po cali si siat nexi cussa etotu no arribat in tempus. Non s’ant a cunsiderai is dimandas chi arribant apustis de su tèrmini ùrtimu. At a balli, duncas, su timbru de su nùmeru de protocollu cun data e ora de arricidura.
PO NDI SCIRI DE PRUS
Po ndi sciri de prus tocat a cuntatai a Dot.ssa M. Sofia Pippia – 0783 397232 – affari.generali@comune.cabras.or.it.