Po Paschixedda una initziativa bella meda po is antzianus de Aristanis.
Dda cuncordat Cristian Cocco chi paris cun Memo Remigi e Laura Aramu cun sa cantzoni “Fiamenti est Paschixedda” promovit una arregorta de dinai po comporai unu aparèchiu de telesucursu in collaboratzioni cun s'Assessorau a is Servìtzius sotzialis de su Comunu de Aristanis e su Rotaract Club de Aristanis.
“Cristian Cocco, comenti a sèmpiri po is festas de paschixedda, imperendi sa calidadi artistica cosa sua at presentau custu progetu chi ocannu est po is antzianus, narant su sìndigu Andrea Lutzu e s’Assessora a is servìtzius sotzialis Carmen Murru.
Su comunu at arricu cun prexu mannu sa proposta e cun su Rotaract Club ddu susteneus po giai unu agiudu po comporai custu machinàriu ".
Dda pensant a sa matessi manera is piciocus de su Rotaract: "seus prexaus de pigai parti a custu progetu, seus sèmpiri stètius atentus a is problemas de sa tzitadi nosta, a movi de is prus pitiadeddus finas a is prus mannus ”.
Sa cantzoni fata duus annus fait de Cristian Cocco, Memo Remigi e Laura Aramu, s'at a podi biri e ascurtai in is canalis social inui s'at a inditai finas sa manera de fai sa donatzioni in su contu currenti cun Iban IT17R0836285630000000005709 intregau a su Rotaract Club de Aristanis cun causali “Agiudaus is ajajus nostus”.
Sa cantzoni at a fai a dda ascurtai a movi de su 20 de su mesi de idas.