S’Assessorau regionali de sa difesa de s’Ambienti, cun nota de su 16 de su mesi de idas u.s., avèrtia asuba un’evolutzioni lesta de sa situatzioni epidemiològica europea de influèntzia aviària, cun una crèscida fitiana de fogus cunfirmaus de virus HPAI, sutatipu H5, in pillonis arestis e de domu in Germània, Olanda, Danimarca, Svètzia, Bèlgiu, Frància, Croàtzia e a ùrtimu finas in Còssiga.
S'allarmi ndi arribat inderetura de unu comunicau de su Ministeru de sa Saludi, po mesu de sa Diretzioni Generali de sa Sanidadi, innui si ponit a primori sa crèscida de s’arriscu de ndi arribai s’infetzioni in sa populatzioni de pillonis de logu de domu e s’abisòngiu de ndi pesai mesuras futas po dda amenguai impressi.
Po custa arraxoni est de fundamentu un’agiudu pari pari intra de is Istitutzionis e is Assòtzius, siat po circai de apubai impressi e sinnalai a is autoridadis sanidàrias de cumpetèntzia cali si siat eventu chi potzat fai pensai a s’influèntzia aviària (po ndi nai una sa crèscida de mortis de custus animalis), siat po ammanniai, in totu su territòriu regionali, is atividadis de cuntrollu passivu in s’avifàuna, po su prus apubendi pillonis malàdius aciapaus mortus, in mesu a totu is pillonis de àcua e is achiladoris.
In lìnia cun su chi ant giai dispostu cun Decretus de s’Assessori de sa Difesa de s’Ambienti nn. 11/2020 e 14/2020, po ammanniai su cuntrollu passivu chi est postu in contu in su Pranu Natzionali Arbovirosi 2020/2025 e po donai una manu a su campionamentu, si ponit a s’avèrtia s’abisòngiu e s’importu de su fatu ca is cassadoris fatzant sinnalamentu e/o donint, impressi, totu is pillonis arestis aciapaus mortus inderetura a s’Istitutu Zooprofilàticu de Sardigna o a su Servìtziu Veterinàriu de sa ATS de cumpetèntzia territoriali.
In prus, in su princìpiu de caudela prus arta, si marcat s’apretu chi is cassadoris, candu funt a cassa, pighint cumportamentus responsàbilis e ònnia mesura de protetzioni sa mellus chi fait po circai de non teni cuntatus cun su virus influentzali.
Cunsiderau artu s’arriscu de atacai su virus torrendi de una bessida de cassa in domu, est de importu mannu su de pigai totu is mesuras de bioseguresa (po nai: a si scàmbiai bistiris e carpitas e a si sciacuai sa personi comenti si depit) candu unu acabbat cun sa cassa, po amenguai ònnia arriscu de atacai s’infestazioni a is pillonis chi mancai funt pesaus in logu de domu.