Nova de linkoristano.it
Una surra de incueddus de plàstica, amiantu, arrodas de màchina s'agatant oru oru a sa strada chi aunit via Gallura e sa localidadi Sa Mestia, in Crabas. Is consilleris de minoràntzia Antonello Fara, Federica Pinna, Sara Meli, Antonello Manca e Gianni Meli pedint unu interventu lestru de s'amministratzioni comunali: “Pedeus chi cussu tretu de strada ddu pongiant in siguresa e chi siat cuntrollau e lacanau e in s'interis si movat unu pianu apretosu de bonìfica po amparai s'ambienti e sa saludi de is tzitadinus e de su stainu”, scrint in unu documentu.
A segus de diversas sennalatzionis, is consilleris comunalis sunt andaus a averiguai custa situatzioni. “In is cidas passadas ant fatu traballus in cussu tretu de strada e a s'oru de su stainu. Ant postu a postu sa carregiada e in cussu tretu de strada nd'ant segau is cannas”. E custus triballus nd'ant fatu bessiri a pillu unus cantu arrefududs lassaus inguni de tempus meda. Is consilleris de minoràntzia dd'ant tzerriada “una grandu discàrriga chi ddui at aintru materialis incuinantis comenti a plàstica, arrodas, retzas, incueddus de ferru e amiantu ”
In prus totu is incuededdus de plàstica chi ndi sunt bessius a segus de custus traballus arriscant , cun su bentu, de si bolai aintru a su stainu.