“Carlo Contini. Imàgini de vida”.
Est su tìtulu de sa giorronada chi, sàbudu 19 de custu mesi, su Comuni de Aristanis bolit arregordai su prus artista connotu aristanesu de su '900.
S’initziativa, de s’Assessorau a sa Cultura de su Comunu de Aristanis e de sa Fundatzioni “Oristano”, dda ant pesada finas gràtzias a su contributu de su MIBACT Diretzioni generali educatzioni, circa e istitutus culturalis e de s’Assessorau de s’Istrutzioni Pùblica e Benis Culturalis de sa Regioni Autònoma de Sardigna, a manu de pari cun sa “Cantina della Vernaccia”, chi ant spartziu sa giorronada in partis po contai mellus sa vida e is òperas de Contini.
“Su 2020 est s’annu chi Carlo Contini at fatu cincuanta annus de morti e me in is mesis passaus eus programmau totu una carrera de initziativas po arregordai custu grandu personàgiu de sa cultura nosta e fai spicai su balori artìsticu artu de sa produsioni sua, chi est unu tesoru, chi non fait a ndi fai stima de cantu est de importu, po sa tzitadi de Aristanis e po totu sa Sardigna intrea – narant su Sìndigu, su Presidenti de sa Fundatzioni “Oristano” e s’Assessori a sa Cultura de su Comuni de Aristanis Massimiliano Sanna -. S’apretu sanidàriu de su Coronavirus non fait a fai is manifestatzionis chi iaus postu in contu, ma totu custu non si firmat a nosu de torrai stima a Contini cun initziativas chi ndi faint spicai sa vida e is òperas”.
Arrimada a una parti, po immui, s’ammosta espositiva, sàbudu s’ant a valorizai sa vida e is òperas cun unu annullu filatèlicu aposta, cun unu cunvènniu in lìnia e incingiendi un’ammosta virtuali.
Si movit a is 10 de mangianu cun s’annullu postali celebrativu de s’anniversàriu de is 50 annus de sa morti de Contini in s’ufìtziu postali de sa bia de Mariano IV. Su materiali filatèlicu, fatu non po totus, at a essi a disponimentu in su “Antiquarium Arborense” finas me in diis afatantis a s’eventu.
A is 10,30 de mangianu nci at a essi su cunvènniu in lìnia “Carlo Contini. La vita e le opere”. Apustis de ai fatu is saludus su Sìndigu, su Presidenti de sa Fundatzioni “Oristano” e s’Assessori a sa Cultura Sanna, ant a pigai fueddu is fillus de s’artista Valerio e Carla Contini, su crìticu de arti Giuliano Serafini, sa circadora Raffaella Piras e su Diretori de sa Fundatzioni “Oristano” Francesco Obino. A s’ora de su cunvènniu s’at a presentai su Tzentru de Documentatzioni asuba de Carlo Contini.
A is 11,30 s’at a incingiai s’Ammosta virtuali “Carlo Contini. Imàginis de vida” in sa prataforma “Kunstmatrix” (www.kunstmatrix.com/en/fondazione-oristano). Aintru de s’ammosta s’ant a podi castiai is imàginis de sa vida de Carlo Contini e is òperas fatas po sa “Cantina della Vernaccia” de Aristanis.
“Su Comuni s’est assuntada totu sa sarvaguàrdia e su valorizamentu de su patrimòniu de òperas, traballu e connoscèntzias chi tenint de biri cun Carlo Contini – marcat s’Assessori Massimiliano Sanna -. Po custa arraxoni in prus de s’ammosta chi ndi allabat s’òpera e chi po immui, po nexi de is normas contras de su Covid est a disponimentu sceti in lìnia, impari a is fillus de s’artista, Carla e Valerio, cun s’agiudu de sa Fundatzioni “Oristano” seus traballendi po fai nasci su Tzentru de documentatzioni e archìviu asuba de Carlo Contini, po podi agiudai a fai connosci e a donai balori a sa figura e a s’òpera sua: custu mangianu etotu sa Giunta at deliberau a manera formali s’istitutzioni sua”.