Sa Federmoto at comunicau su calendàriu 2021 de motocross e, po sa Sardìnnia nci sunt tres eventus de importu.
Su Mundiali de motocross at a cumentzai in abrili, unus cantus cidas apustis che is datas sòlitas e duncas finas is Internatzionalis de Itàlia s'ant a fai apustis; non prus a gennarxu ma po tres domìnigus de sighida de su 21 de frearxu a su 7 de martzu. E duas datas de is tres prevididas, e chi po immoi s'ant a curri sena pùblicu, s'ant a fai in terra sarda.
Sa primu prova s'at a curri duncas in Arriora che de annus meda est sa sedi de s'eventu cuncordau de su Motoclub Motorschool Arriora de su presidenti Fulvio Maiorca. Apustis s'eventu s'at a trantziri a s'Alighera, inui su 28 de frearxu s'at a curri sa segundu tapa a su "Lazzaretto",gestiu de Salvatore Cambule. S'impiantu catalanu giai in su 2016 iat ospitau is internatzionalis.
Sèmpiri in Sardìnnia e sèmpiri In Arriora s'at a curri su Trofeu de is Natzionis Europeas chi at a ospitai is curridoris prus bravus intra is giovunus asuta de is 23 annus in is classis 85, 125 e 250 e is fèminas sena lìmidis de edadi, totus sceraus de is allenadoris de ònnia natzioni. Po immoi est s'Itàlia chi tenit su tìtulu. S'editzioni 2020 chi fiat in programma pròpiu in Arriora , dd'ant annullada po mori de su Covid.