Su Consillu de Amministratzioni de sa Banca de Crèditu Cooperativo de Arborea at detzìdiu de donai 44.000 èurus a is comunidadis de su territòriu aristanesu, po sa còmpora de cosa de papai e àterus benis de primu netzessidadi.
“S'annu chi est acabendi dd'eus a arregordai po su dramma sanitàriu ma finas po cussu econòmicu e sotziali – at decrarau su Presidenti de sa BCC de Arborea Luciano Sgarbossa – e eus pensau paris cun totu is sòtzius de destinai a is chi tenint prus abisòngiu su dinai chi in is annus passaus si imperànt po arregallai bonus spesa e sportas de paschixedda”.
Sa BCC de Arborea at donau 17 milli èurus a sa Caritas de sa Diòcesi de Abas Terraba po is territòrius de Terraba, Mòguru, Guspini e Uras, 22 milli èurus a sa Caritas de sa Diòcesi de Aristanis po Aristanis, Santa Justa, Marrùbiu e Arborea e àterus 5.000 èurus a sa Crèsia de su Sacru Coru de su Comuni de Crabas inui de pagu ant abertu una filiali de sa Banca de Arborea.
Su dinai, in segus a acòrdius pigaus cun is assòtzius chi ant pigau s'agiudu, s'at a podi spendi in su tzentru cash de is Fradis Ibba, chi cumpartzendi sa faina de sa Banca, at detzìdiu de non ammanniai is prètzius.
“In custus tempus de emergèntzia covid, sa Banca nosta – sighit su presidenti Sgarbossa – at agiudau meda meda su sistema produtivu de su territòriu nostu cun 15 millionis de èurus de mutuus donendi pròrogas po unu valori de prus de 50 millionis de èurus.”