Giòbia a mangianu aberrit su primu pianu de su parchègiu de bia Mariano IV.
A is 11,30 at a èssiri su Sìndigu Andrea Lutzu a inaugurai sa strutura chi cun is 134 postus po veturas at a giau unu agiudu mannu po su chi pertocat su problema de su tràficu in su tzentru tzitadinu.
Is parchègius ant a èssiri a indonu e ant a diventai a pagamentu feti candu at a intrai in servìtziu sa sotziedadi chi at bintu s'apaltu de su servìtziu nou.
“Sa tzitadi duncas si nd'est torrada a pigai una strutura importanti apustis de 4 annus chi dd'iant serrada – aciungit su Sìndigu Lutzu -. Dd'iant serrada apustis de ai agiudicau s'apaltu de 3 millionis e 277 milli èurus a s'impresa Dentoni de Casteddu po sistemai e ammanniai su Mercau Tzìvicu de via Mazzini e su parchègiu chi ddui fuit aintru. Unu traballu marcau da stentus grais chi ant portau in su 2018 a sa resolutzioni de su cuntratu. De insaras si seus pigau s'impìnniu de movi una protzedura tècnica difitzili po acabbai su parchègiu e su mercau. Po su parchègiu fiamenti podeus biri is arresultaus de su traballu fatu, mentras po su mercau nc'est de abetai ancora."
Acababu su cuntratu cun s’impresa Dentoni, s'apaltu dd'ant afidau a s'impresa Pellegrini po 2 millionis e 100 milli èurus. Po su parcheègiu s'est spèndiu prus o mancu 1 millioni.
“S'est abertu a primu su pianu de asuba, chi precedit su de aberri totu sa strutura chi tenit 270 parchègius in totu – acrarat s’Assessori a is Traballus pùblicus Francesco Pinna -. Su pianu asuta terra cun 136 parchègius, at a aberri candu at a cumentzai s'apaltu nou de is parchègius a pagamentu. Eus giai fatu sa gara e seus abetendi s'agiudicatzioni in via definitivaa a s'impresa chi depit garantiri unu pianu de siguresa in sa gestioni de su servìtziu."