APRETU COVID-19. RECHESTA BONUS COSA DE PAPAI PO BENIS DE PRIMU NECESSIDADI.
Assinnamentu de bonus spesa po cosa de papai de primu necessidadi po is famìllias in dificultadi, cunforma a su decretu lei 23 de onniasantu de su 2020, n.154 chi a s’art.2.
Si fait sciri ca movendi de oi fait a intregai rechesta po s’assinnamentu de bonus spesa po cosa de papai de primu necessidadi a su Comunu de Prammas. Is rechestas ant a depi arribai mellus cun su sistema de s’istàntzia in lìnia, o a posta eletrònica a s’indiritzu protocollo@comune.palmasarborea.or.it o intreghendi a manu is paperis a s’ufìtziu protocollu de s’enti apustis de s’essi annotaus in antis.
Is arrègulas po s’assinnamentu e s’usu funt custas:
1. Su Contributu s’at a donai a primori a is sugetus sena de nisciunu arrèditu chi potzat assegurai su sustentamentu e sceti acoa a sugetus cun un’arrèditu chi non bastat;
2. Su balori de su bonu spesa at a essi paris a € 150,00 po su primu sugetu, crèsciu de € 50,00 po ònnia cumponenti in prus de su nùcleu familliari;
3. sa rechesta at a depi arribai SCETI segundu sa manera arremonada asuba;
4. is bonus s’ant a podi spendi sceti me in is logus po bendi cunventzionaus cun su Comunu de Prammas chi s’ant a fai sciri candu s’ant a donai is bonus;
5. cun is bonus de spesa s’at a podi comporai sceti cosa de papai, lassendi foras arcòlicus, produtus de gastronomia arta o bèbidas chi non po un’importu chi non podit sartai su 25% de sa còmpora;
6. su bonu spesa at a pigai parti a su pagamentu de su contu finas a s’importu suu nominali, s’integratzioni de su prètziu chi ddui podit essi, ddu at a podi fai sceti in aumentu cun dinai su clienti;
7. non s’amitit su “restu” in dinai asuba su balori de su bonu;
8. su bonu est personali e non si podit lassai a àterus; ddu at a arretirai s’esercìtziu cummerciali po incassai su prètziu de su Comunu intestau;
Is bonus s’ant a podi impreai aintru e sena de sartai su 28.02.2021.
Po ndi sciri de prus cuntatai is nùmerus de cellulari afatantis:
- 3511345633
- 3427590882
Cali si siat manera sceberada po nci dda mandai tocat a nci mandai finas còpia de su documentu de identidadi de su chi fait rechesta.