Alimentatzioni, diabeti e esercìtziu fìsicu – Su tìtulu de su vìdeu nou informativu in s’àmbitu de su progetu “Diabete e Sport 3.0” a disponimentu movendi de oi in s’arretza.
Stràngiu de sa puntada noba, Gianfranco Madau, diabetòlogo cun sa passioni manna po su traballu suu e su sport, coròndua de importu de sa diabetologia de Aristanis.
Dotori Madau in custu vìdeu si chistionat de alimentatzioni e de diabeti cunforma a su sport. In mesu a is imparus cosa sua, unu prus de totu ponit a s’avèrtia: sa connoscèntzia portat a sa libertadi. In custa frasi ddui est totu sa punna de su progetu, a poni a disponimentu is ainas po connosci e gestiri su cumpàngiu diabeti chi unu tenit.
“Diabete e Sport 3.0” est su progetu chi est incurendi s'Aniad Sardigna (Assòtziu Natzionali Italiana Atletas Diabèticus) e su Servìtziu de Diabetologia e maladias metabòlicas de sa Assl de Aristanis, cun su patrocìniu de sa Regioni Autònoma de Sardigna, de s'Assòtziu Mèigus Diabetòlogus Sardigna (AMD Sardigna) e de sa Sotziedadi Italiana de Diabetologia (SID) e Diabeti Itàlia.
S'Assessori a su sport de su Comuni de Aristanis Maria Bonaria Zedda, arreconnoscendi s'importu sotziali de s'initziativa, ddu at cumpartziu e ddu favoressit ospitendi e veiculendi cun su situ istitutzionali is 16 vìdeus informativus asuba de su tema de su sport comenti a aina de preventzioni e de gestioni de su diabeti, po totu sa genti, e in mesu a totu po is chi funt fertus de maladia, chi disìgiant de s'acostai a sa pràtica de s'atividadi motòria.