Sa Provìntzia e su Comuni de Aristanis ant firmau s'acòrdiu po permìtiri a is studiantis de sa scola mèdia Grazie Deledda de imperai is localis de su Liceu Scientìficu.
“Is letzionis in àula sunt cumentzadas giai unus cantu diis ma serbiat unu àutu formali intra de su Comuni e sa Provìntzia - at nau su sìndigu Lutzu. Luegu apustis de àiri cunfirmau ca sa scola de via Santulussurgiu non fadiat a dda imperai eus cumentzau a traballai po agatai una solutzioni.”
“Est una solutzioni interina, chi est stètia possìbili gràtzias a sa disponibilidadi de sa Provìntzia e de su dirigenti scolàsticu de su Liceu Scientìgìficu, aciungit s’Assessori Sanna -.In custas cida eus a acabbai su trasferimentu in is localis de via Solferino e via Marconi, inui is studiantis de sa Grazia Deledda ant a acabbai s'annu scolàsticu. In s'interis sighint is cuntrollus tècnicus po imperai s’Istitutu Frassinetti”.
S'àutu firmau in is diis passadas pertocat s'impreu de 16 àulas, de is ispàtzius comunis e de is bànnius finas a su 22 de su mesi de idas 2020.
Su Comuni s'at a interessai de is ispesas acapiadas a s'impreu de su fràigu (luxi, spesas de telèfunu, àcua, riscaldamentu, pulitzia, àliga).