Cun sa tenta de spaniai pràticas nobas e fai mellus sa percentuali de arragorta sceberada, s'Assessorau a s'Ambienti de su Comuni de Aristanis at incarrerau unu progetu de comunicatzioni e sensibilizatzioni aintru de su Spidali Santu Martinu e in sa Domu Circundariali Salvatore Moro de Màssama.
Sa parti po poni in pràtica s'initziativa educativa, de comunicatzioni e sensibilizatzioni dda at finantziada sa sotziedadi "Formula Ambiente" chi po contu de su Comuni tenit in gestioni su servìtziu de igieni urbana e ndi dda at pesada sa CEAS Aristanis.
In su Spidali Santu Martinu, is atzionis, chi si faint de atesu po chistionis de Covid-19, funt deretas a informai e sensibilizai su personali asuba de sa manera giusta de smartiri s'àliga. Su materiali informativu, chi at incurau CEAS e mandau a sa diretzioni sanidària ddu ant cumpartziu is operadoris sanidàrius. In prus s'est fata una cartellonìstica informativa aposta chi cumpretat cussa chi giai ddui est, chi est poni acanta a totu is postus anca si nci fùliat s'àliga aintru de sa strutura
Me in sa Domu de reclusioni is atzionis funt fatas inguni arrispetendi is protocollus de seguresa po non s'atacai apari su Covid-19. Ndi ant pesau interventus de sensibilizatzioni asuba sa manera giusta de sceberai s'àliga a is detenutus e a is agentis, in prus is detenutus ant fatu duas cumposteras po smartiri s'àliga orgànica.