Su sìndigu de Aristanis at arriciu ariseu in su Palatzu Campus Colonna, s'abbisita de s'Assessori regionali a sa sanidadi Mario Nieddu e de su Commissàriu straordinàriu de s’Ares Massimo Temussi.
“Est stètiu unu atòbiu utilosu po fueddai de is emergèntzias de sa sanidadi aristanesa, cumintzendi de su Prontu Sucursu de su spidali Santu Martinu – at nau su sìndigu Lutzu a s'acabbu de s'atòbiu -.In is ùrtimus annus su comuni de Aristanis s'est fatu testimòniu de totu is problemas chi pertocant sa sanidadi in su territòriu nostu po mori de sa smèngua fitiana de s'assistèntzia sanitària. E in is ùrtimus mesis is fainas de is istitutzionis de su territòriu, de is rapesentàntzias sindacalis e de is comitaus spontaneus sunt stètias sèmpiri prus fortis; finas poita s'emergèntzia sanitària acapiada a su coronavirus at provau una retza sanitària giai in dificultadi manna”.
“Eus agradèssiu sa disponibildadi de s’Assessori regionali e de su Commissàriu starordinàriu de s’Ares a ascurtai is rechestas chi bortas meda eus giai fatu a is istitutzionis regionalis – sighit a nai su sìndigu Lutzu -. Custu atòbiu est serbiu po cumprendi prus de acanta is problemas de Aristanis e de sa provìntzia sua e circai de scerai solutzionis po garantessi s'eficièntzia prena de su spidali Santu Martinu. Prusatotu non si podeus permìtiri chi su Prontu Sucursu abarrit serrau po tempus meda. De custu atòbiu ndi besseus cun sa cunvintzioni chi is solutzionis agatadas si pòngiant in èssiri a manera lesta. ”.