Su studianti Fabio Meloni de Prammas at bintu ocannu sa bursa de stùdiu de 3 milla èurus, assotziada a su prèmiu "Antonello Pinna Merit Award 2020", chi at istituiu su scientziau aristanesu Graziano Pinna, e destinada ònnia annu a una/unu stuadianti apena diplomada/au de su Liceu Scientìficu "Mariano IV d'Arborea" e de su Liceu Clàssicu "De Castro" de Aristanis.
Su diplomau nou de su Liceu Scientìficu "Mariano IV" ddu ant sceberau non feti po is minescimentus scolàsticus ma finas po s'impènniu in fainas de voluntariau, po ai pigau parti a is olimpìadis de sa matemàtica e apustis de ai tentu unu collòchiu cun professori Pinna.
Est arribau segundu, cun un'assènniu de 1000 èurus, Elia Carta, nàsciu a Tàtari, ma residendi in Aristanis giai de piciocheddu e diplomau in su Liceu Scientìficu de Aristanis.
Remoni de mèritu a Giacomo Brugnone de Sàrdara e Francesco Pes nàsciu in Casteddu ma residendi in Aristanis e diplomau in su Liceu Scientìficu de Aristanis, arribaus paris.
9 funt is atestaus de partecipatzioni chi ant donau a àterus studiantis arribaus finalistas in su sceberu: Beatrice Frongia, Carlotta Sanna, Chiara Cao, Gaia Crobu, Luca Zoncu, Marco Deidda, Margherita Mele, Mattia Saba, Sara Manca totus de su Liceu Scientìficu "Mariano IV" de Aristanis e de sa sea stacada de Bilartzi. 7 funt is candidaus chi ant tentu unu votu de maturidadi de 100/100 cun lodi e 6 de cussus ant tentu 100/100.
Sa tzerimònia de premiatzioni dda ant sighida in medas e in medas ant castiau s'intregu de is arreconnoscimentus in sa prataforma "zoom".
Graziano Pinna, immui etotu professori assotziau a s'"University of Illinois at Chicago", at sighiu sa tzerimònia collegau de Chicago innui bivit. Ddui fiat finas sa dirigenti de su Liceu Scientìficu Donatella Arzedi.
Pinna at ammostau is critèrius chi at sighiu, po assinnai is prèmius, sa cummissioni anca ddui figurat Alberta Lai, Diretora de s'Istitutu Italianu de Cultura in Praga, de Casteddu, Mario Macis, professori de Economia in sa "Johns Hopkins University", originàriu de Samugheo, e Angelo Mele issu puru professori assotziau de Economia in sa"Johns Hopkins University" originàriu de Aristanis e po dda acabbai Eugenio Perrier, collaboradori in "Sevendots (sotziedadi de consulèntzia globali) originàriu de Santu 'Èngiu e residendi in Greewich (Connecticut).
Ingreghiendi a is giòvanus a sighiri is bisus e is speras insoru, Pinna at finas chistionau de is arriscus de sa pandemia e de cantu est de importu s'interesa intelletuali in tempus anca sa disinformatzioni si spraxit me in is raportus sotzialis in arretza: "Pagu beni nostu, custu deu ddu apu biviu asuba de sa peddi mia e chistionu in primu personi candu naru ca est mellus a circai de abarrai atesu de su virus po circai de non teni sìntomus chi abarrant in su tempus e mancai a totu vida. Est de primori chi sa genti cumprendat ca su virus nci est e ca est unu ameletzu beru. E pagu beni, chi m'apu cassau su virus no est poita mi ndi seu frigau ma est poita ca funt is àterus a si ndi essi frigaus e est po debadas chi tui ti pongiast sa mascarina candu totu is àterus acanta tua non si dda ponint, poita cussus aici funt protègius ma tui no. E custu est acontèssiu a mimmi".
A su bellieddu de studiantis chi ddui fiat, in mesu a cussus finas is piciocus chi ant bintu me in is annus passaus sa bursa de stùdiu, Pinna ddus at saludaus cun afetu: “Si àuguru de podi essi bosàterus sèmpiri a coru mannu, de bisai e puntai in artu e apoderai arta s'interesa intelletuali de bosàterus sfortzendi-sì de essi cumpretus e onestus po connosci sa beridadi o po arribai a sa decisioni sa prus mellus chi fait in cali si siat situatzioni s'agateis ananti, cumbatendi sa disinformatzioni e is ingiustìtzias de cali si siat arratza".
Su"Antonello Pinna Merit Award 2020"
S'arreconnoscimentu, a sa de cincu editzionis, ddu at istituiu in su 2016 Pinna, professori e circadori in neuroscièntzias in s'"University of Illinois at Chicago", in memòria de su fradi Antonello Pinna, mortu a piciocheddu in su 1992. A donai sa nova de custa decisioni fiat stètiu su scientziau aristanesu chi in custu modu at bòfiu torrai gràtzias a sa tzitadi, chi s'Amministratzioni comunali ddi at dedicau sa “Stella d'Argento – Oristanesi nel Mondo 2016” assinnada a is aristanesus chi ant spicau in su mundu.