Lunis 30 de onnisanti a is dexi e mesu de mangianu s'at a fai sa Festa de sa Munitzipalidadi, unu eventu nou propostu de s'Assessorau a sa Cultura de su Comuni de Aristanis in collaboratzioni cun sa Fundatzioni Aristanis, s'Archìviu stòricu comunali e su MuseuAristanis.
“Sa festa, fata sa primu borta s'annu passau gràtzias a una idea de s’Assessori a sa Cultura Massimiliano Sanna, ocannu s'at a fai in lìnia po mori de is mesuras contra a su Covid” narat su sìndigu Andrea Lutzu.
“Custa festa nascit comenti a eventu culturali istitutzionali chi serbit a arregordai sa festa de Sant’Andrea, giornada inui in s'edadi aragonesa e spanniola si eligiat su Consillu Tzìvicu de sa tzitadi nosta - acrarat s’Assessori a sa Cultura Massimiliano Sanna -. Sa manifestatzioni bolit arregordai sa stòria de sa tzitadi e e is òminis e fèminas de cultura e de is istitutzionis chi ant fatu nodida sa tzitadi de Aristanis e ocannu s'eventu est intregau a s'eletzioni e a is caratèristicas de su Consillu, imperendi is àutus de s'archìviu stòricu comunali. At a èssiri unu atòbiu de importu mannu po connòsciri sa stòria nosta. ”.
Sa cunferèntzia dd'at a introdusi s’Assessori Massimiliano Sanna e dd'at a coordinai Maurizio Casu Curadori de MuseoOristano . Antonella Casula e is archivistas de Fundatzioni Aristanis Rossella Tateo e Ilaria Urgu ant a fueddai de cosas chi in pagus connoscint chi pertocant sa manera de eligi is rapresentantis tzìvicus.