Totu is mèrcuris de su mesi de idas s'at a fai sa microcipadura de is canis chi non sunt scritus a s'anàgrafi canina. Su Servìtziu est a indonu e cuncordau de s'Unidadi Anàgrafi canina de su Dipartimentu de Preventzioni Ats dirìgia de su veterinàriu Giuseppe Sedda.
Is atividadis s'ant a fai ònnia mercuris 2, 9, 16, 23 e 30 de su mesi de idas in is localis de su bocidròxu comunali bèciu. Tocat a prenotai a telèfunu tzerriendi a su nùmeru 345.6619323 de su lunis a su cenàbura de is 10 de mangianu a mesudì e mesu.
Sa microcipadura chi est d'òbligu po lei, tocat a dda fai intra de is primus dexi diis de vida de su callalleddu e sèmpiiri ainantis de cambiai residèntzia. Est una cosa lesta e senna dolori; si ponit unu microcip eletrònicu asuta de sa peddi de s'animali chi permititi de ddu arreconnosci si ddu perdint o ndi ddu furant. Is meris chi non micorcipant is canis issoru podint èssiri santzionaus.
Arrespetendi is mesuras de preventzioni contra a su Covid, tocat a si presentai a s'apuntamentu portendi asuba una mascaredda e cun unu documentu de identidadi, arrespetendi s'oraàriu indicau candu s'est fata sa prenotatzioni po avitai trumas de genti in su matessi momentu. E tocat sèmpiri a poderai sa distàntzia de siguresa de asumancu unu metru de is àterus.
«Sa presèntzia de custus canis scapus e sena meris causat unu impìnniu mannu de dinai po is istitutzionis, chi arruit finas asuba de totu is tzitadinus, narat su diretori de su servìtziu Sedda - Duncas si abetaus sa màssima collaboratzioni.».