Su Consillu Comunali at aprovau a majoria ( 15 votus a favori e 3 contràrius) su regulamentu po is atividadis de writing e street art.
At acrarau sa chistioni s'assessora a is Polìticas de is giòvunus Maria Bonaria Zedda chi at feueddau de s'importàntzia de donai una dissiplina a custa atividadi artìstica.
Cun custu regulamentu, propostu de sa Consulta giòvunus, su Comunu de Aristanis " arreconnoscit su writing e sa street art comenti a espressioni de sa creatividadi de is giòvunus, ndi avalorat totu is formas, permitit de dda fai in totu su territòriu comunali po fai nasci unu raportu bellu intra de is istitutzionis pùblicas e is giòvunus cun sa punna finas de smenguai is atzionis de intzivilidadi in tzitadi e promovi sa manera giusta de espressai custa arti, donendi a is giòvunus sa possibilidadi de si espressai in spàtzius scioberaus de su Comunu.
“Eus ritènniu netzessàriu- narat s’Assessora Zedda - de fai unas cantu arrègulas po dissiplinai sa matèria e avalorai sa fantasia de is giòvunus. Unu regulamentu fatu de doxi artìculus chi inditant comenti espressai custas atividadis in is benis de propriedadi de su comunu e de is privaus chi nd'ant a fai domanda."
“Su regulamentu scerat duncas is logus inui custa atividadi s'at a podi espressai e at a èssiri sa consulta de is giòvunus etotu a individuai is ispàtzius. Su regulamentu previdit finas sa nàscida de unu elencu comuali de is artistas sìngulus o assotziaus ma previdit finas santzionis po is chi non dd'ant a arrespetai."
In su regulamentu si ligit peroa ca su “su Comunu de Aristanis assigurat sa libertadi de espressioni de is writers, ma non si depint realizai òperas ofendidoras, distinghidoras cun sentidu lègiu e chi siant cuntràrias a su decoru pùblicu. Est proibiu finas imperai custas òperas po mandai messàgius publitzidarius o polìticus. In is ispàtzius imperaus duncas non ddui ant a pòdiri èssiri disènnius, scritas cuntrarias a sa morali pùblica e chi espressant messàgius de razismu e contras a religionis e culturas diversas. In prus is chi ant a imperai is ispàtzius postus a disponimentu s'ant a interessai finas de nci bobai s'àliga prodùsia.”