Custa arricurrèntzia dda at istituida s'Assemblea Generali de is Natzionis Unidas sceberendi sa dii in arregordu de is sorris Mirabal in sa Repùblica Dominigana, chi ddas iant bocidas in su 25 de onniasantu de su 1960 po mori de andai contras a su ditadori Rafael Leónidas Trujillo, apustis chi is agentis de is Servìtzius de informatzioni militari ddas iant sercuestadas, violentadas, torturadas, arrogadas a corpus de fusti, atogadas e scavuadas in unu gorropu cun sa màchina insoru po fai crei a un'incidenti.
Istituendi sa dii, cun risolutzioni n. 54/134 de su 17 de su mesi de idas de su 1999, s'Assemblea Generali de is Natzionis Unidas at invitau a totu is guvernus, a is ONG e a is organizatzionis internatzionalis de cuncordai fainas po sensibilitai a sa genti asuba de su problema de sa violèntzia contras de is fèminas.
Problema chi nci at in su Paisu nostu etotu e ca totus impari (mascus e fèminas) tocat de ddu binci cun sa cultura, cun su sabiori, cun s'arrispetu e candu est tardu cun sa denùntzia.