Nova de unionesarda.it
Su sìndigu nou de Brucei ca est finas unu poeta non podiat mancai de tzelebrai sa primu coja in lìngua campidanesa.
Su ritu tzivili dd'ant fatu in sa sala consillari, inui Simone Monni at cojau Antonello Frigau e Silvia Monni: est stètia commotzioni manna intra de is testimòngius Fabiano Asuni e Giulia Monni e de is familliaris presentis.
Unu matrimòniu fatu arrespetendi totu is normas de siguresa contra a su Covid, cun mascareddas, distàntzia e in unu aposentu ariau.
"Apu fatu sa furriadura de s'italianu a su sardu in su matessi tempus - at nau su sìndigu, 30 annus a su primu apuntamentu cun is cojas tzivilis. Depu nai ca mi seu cumòviu, finas poita apu cojau picicous de s'edadi mia. Seu stètiu deu a propònniri su sardu e issus ant nau luegu ca giai. Est stètiu bellu meda".
"Fustei esti su sennori Antonellu Frigau? Bolit pigai cumenti sposa Silvia Monni? "Eia" , at arrespustu.
Apustis su sìndigu at lìgiu totu sa parti chi pertocat deretus e doveris de su matrimòniu. E a s'acabbu su sìndigu poeta at fatu is augùrius a is isposus: " Si àuguru de coru de bivi una vida felici sèmpiri cun amori, unu a su costau de s'àtera"
Silvia, massaja e Antonello, chi traballat in s'edilìtzia si sunt connotus unus cantu annus ainnantis. E immoi sa coja, cun unu sìndigu de s'edadi issoru e chi at fueddau in lìngua sarda.