Si fait sciri a is contribuidoris ca sa Lei n. 160 de su 27 de su mesi de idas de su 2019 (Lei de bilànciu 2020/2022) at postu novas de importu in matèria de fiscalidadi locali e in mesu a totu at disciplinau sa IMU noba, abolendi sa TASI.
Si fait sciri ca po su 16 de su mesi de idas de su 2020 s’est fissada sa dii ùrtima po pagai su SALDU chi pertocat s’IMU po s’annu 2020.
Si arregordat ca, comenti po s’annu 2019, finas po s’annu 2020 is domus principalis e is pertinèntzias de cussas funt esentadas de su pagamentu de s’IMU, foras de is categorias catastalis A/1 - A/8 - A/9 e is pertinèntzias insoru.
Su càrculu de s’imposta po pagai su saldu, chi tocat a fai aintru de su 16 de su mesi de idas de su 2020, s’at a depi fai cunforma a is alìcuotas aprovadas cun Delìbera de su Consillu Comunali n. 29 de su 31.07.2020.
ABARRAI A S’AVÈRTIA: Si arregordat ca sa cuota IMU chi si depit a s’Istadu (categorias catastalis D) tocat de dda pagai impari a cussa chi si depit a su Comunu, impreendi is còdixis aposta de trìbutu istituius cun Resolutzioni de s’Agentzia de is Intradas n. 33/E del 21.05.2013:
Còdixi tributu 3925: chi ddi narant "IMU – imposta municipali pròpria po is immòbilis a usu produtivu classificaus in su grupu catastali D – ISTADU", de impreai po pagai s’imposta po sa parti de alìcuota finas a su 7,60 po milli;
Còdixi tributu 3930: chi ddi narant “IMU – imposta municipali pròpria po is immòbilis a usu produtivu classificaus in su grupu catastali D – ISTADU – INCREMENTU COMUNU", de impreai po pagai s’imposta in prus de su 7,60 po milli;
Cunforma a s’art. 78 de su D.L. n. 104/2020 ant postu in contu s’esòneru de sa 2u arrata IMU 2020 po:
• is immòbilis destinaus a stabilimentus balneàrius de mari, de lagu e de frùmini, is immòbilis de stabilimentus de bàngius;
• is immòbilis chi torrant in sa categoria catastali D/2 (siat cuota Istadu siat cuota Comunu) est a nai albergus e pensionis (sena punna de lucru) e is immòbilis de is agriturismus, de is villàgius turìsticus, de is posadas po sa gioventudi, de is oprigus de monti, de is colònias de mari e de monti, de is allogaderis de aposentus po firmadas curtzas, de is domus e apartamentus po vacàntzia, de is “bed & breakfast”, de is “residence” e de is campègius, a cunditzioni chi ònnia meri siat finas gestori de s’atividadi chi si fait in custus immòbilis;
• is immòbilis chi torrant in sa categoria catastali D in usu de impresas chi tenint atividadi de cuncordai struturas espositivas in s’àmbitu de eventus fierìsticus o manifestatzionis;
• is immòbilis chi torrant in sa categoria catastali D/3 destinaus a spetàculus cinematogràficus, teatrus e salas po cuncertus, spetàculus, bastit chi su meri siat su matessi de su gestori de s’atividadi;
• is immòbilis destinaus a discotecas, salas po baddai, “night-club” e sìmbilis, a cunditzioni chi su sugetu chi est meri siat su matessi de su sugetu gestori de is atividadis etotu.
Cunforma a s’art. 9 de su D.L. n. 137/2020, cunsiderendi is efetus chi tenint de biri cun s’apretu epidemiològicu de COVID-19, est postu in contu s’esòneru de sa 2u arrata IMU 2020 chi pertocant is immòbilis e is pertinèntzias suas innui si faint is atividadis inditadas in s’allegau 1 de custa, a cunditzioni chi ònnia meri siat finas gestori de s’atividadi etotu chi si fait in custus immòbilis.
Est a disponimentu sa ghia po is contribuidoris e su modellu F24 semprificau, chi si podint scarrigai de is indiritzus postus a ladu (in su giassu istitutzionali)
In prus est a disponimentu su’indiritzu po intrai a su programma de càrculu de s’imposta chi pertocat e s’imprenta de su modellu F24 cumpilau (si consillat de apurai totu is datus innantis de imprentai e pagai s’imposta).
In su programma “CALCOLO IMU 2020” abisòngiat a mudai a manu s’alìcuota de impreai po is immòbilis chi arruint in sa zona agrìcula “E” e in sa zona industriali D0, chi arresurtant in su Pianu Urbanìsticu Comunali in vigori.
Su tributu est pagau in autulicuidatzioni de su contribuidori. Su comunu non mandat modellus de pagamentu giai cumpilaus.
Po cali sia siat informu in prus po totu custu fait a cuntatai su Servìtziu Tributus, totu is mangianus de sa ora de is 11.00 a sa ora de sa 1:45 e a su merii de mèrcuris de sa ora de is 3:30 a sa ora de is 6:30.
tel.: 0783/354517.
Posta eletrònica: tecnico.tributi@comune.santagiusta.or.it.
Su Responsàbili de su procedimentu est su Geom. Giovanni Musinu.