Nova liada de linkoristano.it
Unu screening a totu sa populatzioni de Santa Justa po averiguai cantu su coronavirus est spainau in sa bidda e unu agiudu a totu is atividadis chi ant dèpiu serrai o smenguai su traballu po mori de sa crèscida de is contàgius. A ddus domandai est su grupu consillari de minoria Othoca – Santa Justa.
In una lìtera firmada de su capugrupu Matteo Garau (cun Antonello Figus, Maria Gabriella Caria e Sandra Pili), is consilleris de minoria cumbidant s'amministratzioni comunali a distinai asumancu 25 milli èurus po cuncordai una circa epidemiològica imperendi tamponis lestus.
Garau, Figus, Caria e Pili pedint in prus de distinai asumancu 25 milli èurus po cuncordai unu fundu de agiudu a is atividadis produtivas penalizadas de su Dpcm chi at a abarrai in vigori finas a su 3 de su mesi de idas 2020.
Is consilleris de su grupu Othoca arregordant ca po mori de s'emergèntzia sanitària e econòmica s'amministratzioni comuali at benefitziau de unu fundu statali de prus de 86 milli èurus po cumbati sa crèscida de is ispesas e sa smèngua de is ricavus; àterus 22.800 èurus – chi fait a ddus imperai giai ocannu – sunt arribaus cun s'acontu prevididu de su decretu 104/2020 (art. 39).