Su Comunu de Mòguru, cun resursas de s’Amministratzioni Comunali, at emìtiu unu cuncursu po giai 6 bursas de stùdiu a studiantis chi si sunt diplomaus in s’annu scolàsticu 2019/2020.
Podint benefiziai de sa bursa de stùdiu comunali is istudiantis chi tenint custu recuisitus:
1. Residèntzia in su Comunu de Mòguru;
2. Diplomaus in s’annu scolàsticu 2019/2020 cun unu votu non prus bàsciu de 80/100;
3. Non tenint prus de 21 annus a su 31/12/2020;
4. Si sunt diplomaus in non prus de cincu o ses annus, cunforma a su chi durat su cursu de stùdiu.
S’at a fai una graduatòria de mèritu, sighendi su votu de diploma chi arregordaus ca non podit èssiri purs bàsciu de 80/100.
Is interessaus depint intregai intra de su 18 de su mesi de idas 2020 a su Comunu de Mòguru, custus paperis:
· Domanda e decraratzioni sustitutiva in sa modulìstica dedicada, sutascrita de unu genitori o de chi ndi tenit sa potestadi o de su studianti chi tenit 18 annus;
· Còpia de unu documentu de arriconnoscimentu de su chi fait sa domanda;
Is interessaus (studiantis cun 18 annus fatus o genitoris in casu cuntràriu) podint arretirai su mòdulu de domanda in comunu o ddu podint scarriai de su giassu istitutzionali.
Po su chi pertocat su protzedimentu nomonau “Bursa de stùdiu po diplomaus”, ligei s’informativa apitzus de sa privacy cuncordada de su Comunu po su chi pertocat is bursas de stùdiu a diplomaus in s’annu scolàsticu 2019/2020, publicada paris cun custu bandu.