Su Collègiu de s'Istitutzioni Sa Sartìllia, s'organu de sa Fundatzioni Aristanis chi avalorat e promovit sa Sartìllia, s'est atobiau po fueddai de s'editzioni de sa manifestatzioni po su 2021.
Bida s'emergèntzia sanitària chi seus bivendi, su Collègiu at nau ca immoi comenti a immoi non est possìblili nai si sa Sartìllia, chi ocannu arruiti in is diis de su 14 e 16 de friàrxu s'at a fai e comenti. Sa situatzioni difati, chi mudat dì po dì non permititi de pigai una detzisioni crara.
Po su chi pertocat s'organizatzioni tècnica, is ufìtzius de sa Fundatzioni ant a cumentzai a fai su chi serbit a cuncordai sa manifestatzioni, abetendi de cumprendi comenti at a sighiri sa situatzioni sanitària a livellu locali e natzionali.
S'est detzìdiu de andai ainnantis po immoi cun atividadis de valorizatzioni e promotzioni de s'eventu chi annu po annu permitant de fai connòsciri sèmpiri de prus sa Sartìllia in totu su mundu, po fai lompi in Aristanis genti de ònnia logu. S'at a sighiri aici imperendi prusatotu is resursas de su web, po poderai arta s'atentzioni e circai de fai connòsciri sèmpiri de prus custu eventu.