CONTRIBUTU SPESAS VIÀGIU ISTITUTU CUMPRENSIVU A.S. 2020-2021 – SCADÈNTZIA SU 4 DE SU MESI DE IDAS DE SU 2020
SA RESPONSÀBILI DE SU SERVÌTZIU
Ponendi in pràtica sa detèrmina sua n. 927/209 de su 16.11.2020 fait sciri ca custu Comunu bolit incarrerai, po s’annu scolàsticu 2020/2021 cun dinai suu, a licuidai unu contributu po is spesas de viàgiu in favori de is famìllias de is studentis chi viàgiant chi tenint sa residèntzia me in is burgus, a su postu de su servìtziu de trasportu scolàsticu, fatu in passau, cun su scolabus.
Is famìllias interessadas ant a podi intregai a su Comunu, a s’Ufìtziu Protocollu, aintru de sa data de su 4 de su mesi de idas de su 2020, istàntzia de cuncessioni de su contributu in modellu aposta chi su Servìtziu Amministrativu de s’Enti at aprontau.
Sa responsàbili de servìtziu, at a podi, a giudìtziu suu chi no est de poni in chistioni, apurai su tretu chilomètricu a sa dii, movendi de sa domu a sa bidda, chi at decrarau su chi at fatu rechesta.
A ònnia famìllia chi at fatu rechesta e chi ndi tenit deretu, s’at a licuidai un’importu paris a su 20% de su costu de sa benzina super a Km fatu. Su costu de sa benzina s’at a decidi sa dii de sa publicatzioni de custu bandu.
Po lograi su contributu teòricu prus mannu chi spetat cunforma a is fàscias ISEE elencadas asuta, s’alunnu at a depi frecuentai po 80% de is diis stabilidas in su calendàriu scolàsticu. Asuta de custa làcana de frecuèntzia, su contributu s’at a sighiri a decurtai in proportzioni a is presèntzias decraradas, cun àutu sustitutivu de su genidori o de chi ndi tenit sa pàtria podestadi.
A su chi fait rechesta sena de auniri sa decraratzioni ISEE, s’at a apricai sa fàscia prus arta (fàscia C), aprichendi s’80% de su contributu chi spetat.
|
FÀSCIA A |
ISEE de € 0 |
A € 24.999 |
100% de su contributu teòricu chi spetat |
|
FÀSCIA B |
ISEE de € 25.000 |
A € 29.999 |
90% de su contributu teòricu chi spetat |
|
FÀSCIA C |
ISEE de € 30.000 |
|
80% de su contributu teòricu chi spetat |
S’arrembursu s’at a amiti sceti a nùcleu familliari. Acontessendi prus de unu fillu, chi frecuentant s’Istitutu Cumprensivu de Santa Justa, su contributu s’at a donai sceti a unu de cussus. Su càrculu at a teni contu, comenti si siat, de s’impreu de su mezu chi unu tenit po portai a scola finas unu sceti de is fillus suus. Is diis de ausèntzia (po is nùcleus familliaris cun prus de unu fillu) s’ant a carculai asuba de su fillu chi est ammancau prus pagu.
Coberadas is dimandas, s’ufìtziu amministrativu s’at a incurai de apurai is istàntzias e a licuidai un’acontu paris a su 25% de s’importu presuntu chi spetat.
A licuidai su saldu, fatas chi siant is verìficas aposta, s’at a atendi a s’acabbu de s’annu scolàsticu.
Is mòdulus de sa dimanda po pigai parti funt a disponimentu in s’Ufìtziu Protocollu e in su giassu istitutzionali.
Po totu is crarimentus chi nci iant a podi essi, Responsàbili de su procedimentu: Senn. Fabrizio Melis, tel. 0783354519 - segreteria@comune.santagiusta.or.it.