Su paesàgiu a ingìriu a sa bidda de prus formas e coloris arregalant momentus ammajadoris. Is àcuas trancuillas de su stainu de Pauli Majori, paradisu de is appassionaus de birdwatching, acullint su caboni de àcua, sa menga arrùbia e intra de is tanti matas, unas cantu orchideas. Est una de is zonas ùmidas de prus importu in Itàlia.
In su parcu de su monti Arci, sa stèrrida prus manna de pedra crobina in Sardìnnia, as a fai unu viàgiu agoa de 8 milli annus, candu totu is pòpulus mediterràneus arribànt in s'ìsula lassendi is arrastus issoru, po circai s'oru nieddu de su Neolìticu. Materiali chi beniat imperau po fai armis e ainas preistòricas. Is testimònius movint de su Neolìticu nou po arribai finas a s'edadi nuràgica. Sa parti de foras de su monti Arci est fata de lava de pedra niedda, mentras aintru ddu at pedra molina. Is cundutus vuIcànicus acabbant in tres cùcurus ( su prus artu est cussu de Trebina Longa, 812 metrus), chi arregordant sa figura de unu trèmini. A ammantai totu su monti agataus ìxili e màchia mediterrànea cun calchi mata de otigu e arroli. In su territòriu de Prammas agataus finas su padenti nomonau sa Dispensa, 150 etaras de terra inui bivint schirrus bucamelis e pillonis agripiadoris.