Tocat a agatai luegu una solutzioni po is studiantis de sa scola Gràzia Deledda, serrada in is diis passadas. In s'interis est cumentzada sa didàtica a distàntzia, ma intra de calchi cida is piciocheddus ant a torrai in classi in is àulas a disponimentu in àterus edifìtzius scolàsticus finas a arribai a una sistematzioni definidora in un àteru locali. Si pensat a s'Istitutu Frassinetti, Fràigu de propriedadi de sa Provìntzia in su bixinau de su Sacro Cuore acanta a sa scola Grazia Deledda, ma tocat a ndi averiguai is cunditzionis.
Ant fueddau de custas tres solutzionis su Sìndigu Andrea Lutzu, s’Assessori a s'Istrutzioni Pùblica Massimiliano Sanna, e sa dirigenti scolàstica Pasqualina Saba.
Abetendi duncas su cunfrontru intra de babbus e mammas de is studiantis po cumprendi comenti acabbai custu annu scolàsticu (prus de unu turnu in sa scola de via Amsicora, portai is picicoheddus in sa scola de Silì, spartziri is classis in is scolas de via Solferino e via Marconi), Comuni, dirigèntzia scolàstica e rapresentantis de maistus e genitoris sunt valuntendi ònnia solutzioni.
“Is interessus de is pipius sunt sa punna nosta – narant Lutzu e Sanna -. Depeus permìtiri a sa dirigèntzia scolàstica de sighiri cun is atividadis didàticas, duncas ancora po pagu tempus eus a sighiri cun sa didàtica a distàntzia. Intra de calchi cida peroa is pipius ant a torrai in classi, capatzu chi sa solutzioni at a èssiri cussa de partziri is studiantis in is scolas de via Solferino e via Marconi”.
“Su Sacro Cuore tenit su deretu de àiri una scola e eus a fai totu su chi podeus po dda giai a is studiantis de custu bixinau: s’Istitutu Frassinetti iat a pòdiri èssiri una solutzioni ma non boleus improsai a nemmusu, pretzisant sìndigu e assessori. Tocat a averiguai is cunditzionis de s'edifìtziu e eus cuntatau s’Amministradori straordinàriu de sa Provìntzia po unu subralogu po cumprendi si fait a sighiri custa strada.