Is istudiantis de sa scola primària paritària de su Sacro Costato ant torrau a cumentzai is letzionis in presèntzia in is ispàtzius de sa scola elementari de via Solferino.
“Gràtzias a sa disponibilidadi de su dirigenti scolàsticu, Maria Giovanna Pilloni, eus agatau una solutzioni provisòria chi permitit de fai torrai a scola is pipius de sa scola elementari de su Sacro Costato chi sunt in domu cun didàtica a distàntzia de duas cidas po mori de casus de covid intra de is mòngias chi ant portau a serrai sa scola, narant su sìndigu Andrea Lutzu e s’Assessori a s'Istrutzioni Pùblica Massimiliano Sanna.
“Giai a partiri de is primus diis de serrada, eus propostu una sistematzioni noba po permìtiri a is pipius de sighiri is letzionis in presèntzia, sighit a nai Sanna -. Sa dirigèntzia de s'istitutu pensendi de arresolvi su problema chi pertocat is mesuras contra a su covid a manera lestra iat detzìdiu de abetai. Ma cumprèndiu ca non fiat una situatzioni chi s'arresolviat luegu, lunis 9 de onnisanti ant acòlliu sa proposta e in tres diis gràtzias a sa disponibilidadi de sa dirigèntzia de s'Istitutu comprensivu numero 1, is pipius sunt torraus in classi
In is cidas chi benint sa scola de su Sacro costato s'at a depi adecuai a is mesuras anti-Covid po fai torrai a scola totu is pipius- narant su Sìndigu Lutzu e s’Assessori Sanna chi marcant su momentu de dificultadi chi bivit sa scola aristanesa po mori de s'emergèntzia sanitària dèpia a su coronavirus.
Non si scaresceus difati de is studiantis de sa scola Grazia Deledda chi sunt in didàtica a distàntzia, mentras seus fendi de totu pa agatai una solutzioni chi permitat finas a custus piciocheddus de torrai a scola.