Su Comuni de Aristanis at aprovau sa graduatòria generali definitiva po assinnai is domus de edilìtzia residentziali postas in su territòriu de su Comuni de Aristanis.
De is 269 istàntzias intregadas, 221 ddas ant amìtias, 45 nono e 3 ant renuntziau.
Ant aprovau finas is sub-graduatòrias po is categorias prioritàrias de cuncorrentis (art.13 de sa L.R.13/89) e in mesu a totu is chi faint parti de is categorias de is chi ant sartau is sessanta annus, is còpias giòvanas e is invàlidus e is chi portant andicap.
"Sa graduatòria est su frutu de unu traballu longu longu e pilincosu chi at fatu sa cummissioni traballendi is istàntzias cun trasparèntzia e cumpetèntzia - narat s'assessori a is Servìtzius sotzialis Carmen Murru -. Cun sa graduatòria noba eus a essi capassus de assinnai is domus chi s'ant a donai a disponimentu a is chi ndi tenint prus abisòngiu".