Si fait sciri a is tzitadinus ca su Comunu de Siamajore bolit incarrelai unu còmpudu sanidàriu po sa populatzioni chi tenit sa residèntzia, cun test a tamponi a arresurtau lestu cun is costus totu a càrrigu de su bilànciu comunali. Is test s'ant a fai in su locali acanta a s'ambulatòriu, in diis chi s'ant a fai sciri prus in antis cun comunicau. Po apurai s'interessu a su còmpudu e cantificai is test chi tocat a comporai, si invitant a is tzitadinus a cumpilai su mòdulu de pre-adesioni e a ddu torrai a su Comunu, ponendi-ddu in sa cascita posta aintru de su municìpiu o a posta eletrònica a s'indiritzu: protocollo@comune.siamaggiore.or.it aintru de is mesudii de sa dii 17.11.2020.
Non s’ant a carculai is dimandas arribadas a tardu sartau su tèrmini.
S’est postu in contu unu test sceti a nùcleu familiari.
In antis de fai su test, ònnia tzitadinu at a depi intregai sa decraratzioni de cunsensu chi at a essi a disponimentu me in is diis infatu publichendi-ddu in su giassu in arretza de su Comunu e/o me in is ufìtzius.