Sa scola mèdia Gràzia Deledda no at passau is cuntrollus tècnicus po su chi pertocat s'arriscu sìsmicu e stàticu e a movi de ariseu est serrada.
Ddu disponit una ordinàntzia de su dirigenti de su setori Traballus Pùblicus de su Comuni de Aristanis, s’ingennieri Roberto Sanna, chi at arriciu e averigua sa relata de s'assòtziu de Ingennieria BLT & Partners de Casteddu ca at decrarau ca sa scola no est idonea”.
“De su documentu presentau sighendi is simulatzionis , is càrculus e is averiguamentus de stabilidadi, ndi bessit ca sa strutura de sa scola de sa bia Santulussurgiu non si podit imperai po is punnas cuncordadas - narat Sanna -.Duncas non essendi-nci is cunditzionis po dda imperai tocat a protzedi cun su sbarratzu”.
Sa relata de s'assòtziu de ingennieria dd'ant intregau a su comunu mèrcuris e apustis de una pariga de parris de su sìndigu Lutzu, de s’Assessori a s'Istrutzioni Pùblica Massimiliano Sanna, de s'ingennieri Sanna e de sa dirigenti scolàstica Lina Saba,s'est detzìdiu de serrai sa scola po sa siguresa de is istudiantis e is maistus e totu su personali.
Ariseu a mangianu su Sìndigu paris cun is Assessoris interessaus e is dirigentis ant fatu unu subralogu in s'edifìtziu e a s'acabbu ant fatu s'ordinàntzia lestra po serrai sa scola finas a unu provedimentu nou.