Mòguru e is binus cosa suus
Sa Sardìnnia est comenti a unu continenti chi mancai piticheddu presentat diversidadis geològicas, idrogràficas e finas de curtura. Est propiu de custa diversidadi chi ndi benit una variedadi manna de produtus in totu is setoris, finas in cussu de is binus.
Mòguru chi in custa arti est de tempus meda chi si scerat, contat bingialis de àntiga traditzioni comenti a su cannonau, su nuragus e su semidano chi fait a cunsiderai originàrius de s’ìsula, àterus binus invècias tenint apròliu fenìtziu pùnicu e romanu, àterus ancora comenti a monica, carignano e bovale ndi benint de sa curtura catalano-aragonese e greco-bizantina, bastit pensai a sa malvasia e a su gregu. In su territòriu mogoresu ddu at finas àterus bingialis de apròliu antigu e non connotu, chi minescint issus puru de èssiri cunsideraus.
Sa cantina de Mòguru “Il Nuraghe” produsit binus chi ndi benint de is bingialis traditzionalis chi agataus in cussu territòriu, inui s’est sighiu a praticai custa arti antiga chi est finas unu patrimòniu mannu de connoscèntzia.
Sena duda is caladroxus durcis, su soli e s’arriu sunt is sarchetus de custu binu bonu chi tenit sabori de Marmilla. E chi a movi de su 1956 e finas a oi at tentu arriconnoscimentus mannus e prèmius, non feti in Sardìnnia ma in sa penìsula e in totu su mundu, fadendi connosciri a totus, Mòguru e is bingiateris suus.